Logo

मधेसी मोर्चा बार्तामा बस्न तयार


दिनभरको रस्साकस्सीपछि संयुक्त लोकतान्त्रिक मधेसी मोर्चा वार्तामा आउन तयार भएको छ । संघीय समाजवादी फोरमको तीनकुनेस्थित मुख्यालयमा बिहीबार बिहानदेखि राति ९ बजेसम्मको संघीय गठबन्धन र त्यसपछि मोर्चाको पालैपालो बैठकपछि मधेसवादी नेताहरू प्रधानमन्त्री केपी ओलीलाई सातबुँदे जवाफ लेख्न सहमत भएका हुन् । पत्र मोर्चा आबद्ध सात मधेसवादी दलका तर्फबाट पठाइएको छ । प्रधानमन्त्रीले दुवै समूहलाई आह्वान गर्दै फेरि पत्र पठाए वार्तामा मोर्चा र गठबन्धन आ–आफ्नै हैसियतमा जान तयार रहेको स्रोतले कान्तिपुरलाई बतायो । पत्रमा वैशाख २६ र जेठ ३० गते सरकारका तर्फबाट पठाइएको पत्रबारे मोर्चाको ध्यानाकर्षण भएको भन्दै मोर्चा नेताहरूले ३६ पटक वार्ता भइसकेको हुँदा अब परिणाममुखी सरकारी पहलको अपेक्षा गरेका छन् ।
‘मोर्चा सम्मिलित संघीय गठबन्धनद्वारा आन्दोलन जारी रहेकाले गठबन्धनलाई पनि वार्ताका लागि सरकारले बोलाउनुपर्दछ,’ मोर्चामा आबद्ध सातै मधेसवादी दलका नेताले हस्ताक्षर गरेको पत्रमा भनिएको छ, ‘वार्ताको उपयुक्त वातावरण बनाएको खण्डमा सार्थक वार्ताका लागि मोर्चा तयार रहेको व्यहोरा अवगत गराउन चाहन्छौं ।’मधेस आन्दोलनका क्रममा सरकारले अत्यधिक बल प्रयोग गरेकाले स्वतन्त्र छानबिन गर्न पत्रमा माग गरिएको छ । सरकारसमक्ष मोर्चाद्वारा प्रस्तुत ११ बुँदे प्रस्ताव र गठबन्धनद्वारा प्रस्तुत २६ बुँदे प्रस्तावबारे सरकारबाट अझसम्म कुनै स्पष्ट धारणा नआएको पत्रमा उल्लेख छ ।ooooo
आन्दोलनरत पक्षका नेता कार्यकर्तामाथि दमन गर्ने, झुटा मुद्दा लगाउने, धरपकड गर्ने र यातना दिने कार्य जारी रहेकाले परिणाममुखी र सार्थक वार्ताका निम्ति उपयुक्त वातावरण तयार गर्ने जिम्मेवारी सरकारकै भएको पत्रमा उल्लेख छ ।
पत्रमा समाजवादी फोरम अध्यक्ष उपेन्द्र यादव, तमलोपा उपाध्यक्ष वृषेशचन्द्र लाल, सद्भावना अध्यक्ष राजेन्द्र महतो, तमसपा अध्यक्ष महेन्द्र रायलगायत सातै मधेसवादी दलका नेताले हस्ताक्षर गरेका छन् ।
गठबन्धन पनि सकारात्मक, गुरुङ नयाँ प्रवक्ता त्यसअघि २६ बुँदे मागप्रति सरकारी प्रतिबद्धता माग्दै गठबन्धन बैठक सकिएको थियो ।
प्रधानमन्त्री केपी ओलीले वार्ता आह्वानसहित पठाएको पत्रबारे छलफल गर्न बसेको संघीय गठबन्धनको बैठक वार्ताको विश्वासिलो आधार तय गर्न सरकारलाई आग्रह गर्दै मोर्चा निर्णयको प्रतीक्षासहित सकियो । फोरम कार्यालयमा गठबन्धन बैठक सकिनेबित्तिकै पहाडी जनजाति पार्टी नेता ओर्लिए । मधेसी मोर्चा नेता भने माथि उक्लिए ।
बैठकले वार्ताका लागि विश्वासिलो आधार बनाउन, गठबन्धनले बुझाएको २६ बुँदे मागपत्र सम्बोधनको प्रतिबद्धता जनाउन सरकारसमक्ष माग गरेको प्रवक्ता ओम गुरुङले बताए ।
प्रवक्ता परशुराम तामाङ ५ दिनअघि नयाँ शक्तिमा प्रवेश गरेपछि गुरुङ बिहीबारकै बैठकबाट प्रवक्ता घोषित भएका हुन् । उनी गठबन्धन आबद्ध पद्मरत्न तुलाधर नेतृत्वको आदिवासी जनजाति राष्ट्रिय आन्दोलन नेपालका समेत प्रवक्ता हुन् ।
गठबन्धन बैठक सुरु हुनेबित्तिकै प्रधानमन्त्री ओलीका सबै पत्रमा मधेसी मोर्चालाई मात्रै सम्बोधन गरिएको भन्दै समाजवादी फोरमलगायत जनजाति घटकका नेताहरूले आपत्ति जनाएका थिए । संघीय गठबन्धनलाई चिठी आए मात्रै वार्ताबारे सोच्न सकिने उनीहरूको अडान थियो ।
तमलोपा, सद्भावना, फोरम गणतान्त्रिक, नेपाल सद्भावना पार्टीलगायत मधेसवादी दलले भने हालसम्मको आन्दोलन र वार्ता मधेसी मोर्चाकै नाममा भएकाले प्रधानमन्त्रीको पत्रमा त्यसलाई स्वीकार गरिएको हुँदा पत्रलाई सकारात्मक रूपमा लिइनुपर्ने तर्क गरेका थिए ।
बिहानको गठबन्धन बैठकमा फोरम अध्यक्ष उपेन्द्र यादव, तमलोपा उपाध्यक्ष वृषेशचन्द्र लाल, सद्भावना सहअध्यक्ष लक्ष्मणलाल कर्ण, लिम्बुवान पार्टी अध्यक्ष कुमार लिङ्देन, नेताहरू प्रेम खाती, गणेश गुरुङलगायत सहभागी थिए ।
गठबन्धन बैठक सकिएलगत्तै फोरम कार्यालयको पाँचौं तलामा मधेसी मोर्चाको बैठक सुरु भएको थियो । बैठक सुरु गर्दै फोरम अध्यक्ष यादवले ओलीको पत्र गठबन्धन र मोर्चाभित्र विवादको कारक बन्ने नियतले पठाइएको भन्दै आन्तरिम मतभेद कोठाभित्रै सल्टाउन, बाहिर एकै आवाज राख्न आग्रह गरे ।
‘हामीभित्र पनि कमजोरी हुन सक्छन्, तर अहिले गुमेको अधिकार फर्काउने साझा एजेन्डामा हामी छौं,’ यादवलाई उद्धृत गर्दै बैठक स्रोतले भन्यो, ‘हामीलाई एक–अर्काको कार्यशैली मन नपरेको हुन सक्छ । तर यो तिक्तता पोख्ने बेला होइन । ओलीको पत्रबारे के गर्ने, साझा निर्णयमा पुगौं ।’
मोर्चा र गठबन्धनबीच विवादले २९ दलभित्रका पहाडी जनजाति पार्टी र मधेसवादी पार्टीबीचको सहयात्रा के हुने भन्ने प्रश्न उब्जिएको थियो ।
यादव, सद्भावना अध्यक्ष राजेन्द्र महतोलगायतले असन्तुष्टि साम्य पार्न भूमिका खेलेको स्रोतले बतायो । तर साना मधेसवादी दल भने गठबन्धनमा जाँदा मोर्चाको हैसियत गुम्न पुगेको भन्दै मोर्चालाई नै अगाडि बढाउनुपर्ने मागमा अडिग रहे ।
सुरुको १५ मिनेट बैठक तिक्ततामा परिणत भएपछि फोरम अध्यक्ष यादव बैठक हलबाट निस्केर आफ्नो कार्यकक्षमा छिरेका थिए । त्यसको एकछिनपछि नेपाल सद्भावना पार्टी अध्यक्ष अनिलकुमार झा पनि निस्केपछि अरू नेताले दुवैलाई फकाएर बैठकमा हुलेको मोर्चाको एक घटकका नेताले बताए ।
ती नेताका अनुसार अरू बेला यादवसित ठाडठाडै चर्कने महतो भने संयम र समाधानमुखी भएर बैठकमा प्रस्तुत भएका थिए ।
‘मोर्चासित प्रधानमन्त्रीले कुरा गर्न चाहेकामा आपत्ति होइन, तर संघीय गठबन्धनलाई पनि बोलाउनुपर्छ भन्नेमा छलफल भएको हो,’ बैठकपछि रामसपा प्रवक्ता केशव झाले भने, ‘बैठक सौहार्दपूर्ण वातावरणमा टुंगियो, कुनै विवाद भएको होइन ।’
गठबन्धन जेठ १ देखि काठमाडौं केन्द्रित आन्दोलनमा छ । हाल असार मसान्तसम्मका लागि रिले अनशन चलिरहेको छ ।

लाजिम्पाट बैठकले बनायो कार्ययोजना

प्रधानमन्त्री केपी ओलीले बुधबार बिहानै लोक सेवा आयोगको कार्यक्रममा तीन तहको निर्वाचन गर्ने प्रारम्भिक समयसीमाबारे सार्वजनिक घोषणा गरेका थिए । त्यसपछि दिनभर व्यस्त रहेका सत्तारूढ प्रमुख चार दलका नेता साँझ माओवादी केन्द्रका अध्यक्ष पुष्पकमल दाहालको निवास लाजिम्पाटमा भेला भए । प्रधानमन्त्री ओली, अध्यक्ष दाहाल, राप्रपा नेपालका अध्यक्षसमेत रहेका उपप्रधानमन्त्री कमल थापा, फोरम लोकतान्त्रिक अध्यक्षसमेत रहेका उपप्रधानमन्त्री विजयकुमार गच्छदार, अर्थमन्त्री विष्णु पौडेल लगायतका नेता लाजिम्पाटमा बसेका थिए ।
आउँदो चुनावसम्म गठबन्धन नटुटाइकन अघि बढ्ने मनस्थिति बनाएका चार दलबीच संविधान कार्यान्वयनको विस्तृत कार्ययोजना ल्याउनुपर्नेबारे सहमति बन्यो ।
प्रधानमन्त्री ओलीले अनौपचारिक छलफल क्रममा रहेको त्यो विषयलाई बुधबार बिहानै करिब सार्वजनिक गरिसकेका थिए ।
साँझ तिनै विषयलाई समेत सम्बोधन गर्ने गरी संविधान कार्यान्वयनको समयतालिकामा समझदारी भयो । लाजिम्पाट बैठकको समझदारीअनुसार बिहीबार मन्त्रिपरिषद् बैठकले विस्तृत कार्ययोजना पारित गरी संसद्मा पेस गर्ने निर्णय गरेको हो । एजेन्सी

प्रतिक्रिया दिनुहोस्