Logo

ठण्डा दिमागले सोच्न मौन अवधि


काठमाडौ,पहिलो चरणमा प्रतिनिधिसभा र प्रदेशसभाको निर्वाचन हुँदै गरेका ३२ जिल्लामा बिहीबार रातिवाट मौन अवधि शुरु भएको छ । निर्वाचनमा हुने प्रचारप्रसारका क्रममा व्यक्त प्रतिबद्धता, घोषणापत्र र उम्मेदवारको बिषयमा ठण्डा दिमागले सोंचेर विवेकसम्मत रुपमा आफुले कस्लाई मतदान गर्ने भन्ने बिषयमा मतदाताले निर्णय लिनका लागि शान्त वातावरण चाहिन्छ । कोलाहलपूर्ण अबस्थामा र तनावयुक्त अबस्थामा उचित निर्णय गर्न समस्या हुनसक्छ । यस्तै मान्यताका आधारमा मतदान हुनुभन्दा ७२ घण्टा पहिलेदेखि मौन अबधि शुरु गर्ने परम्परा रहदै आएको छ । नेपालमा मात्रै हैन, अन्य देशहरुमा पनि यस्तो अभ्यास रहेको पाइन्छ । अहिले संबिधानसभा निर्वाचन आचार संहिता २०७०मा भएको व्यबस्था अनुसार मौन अबधि शुरु भएको हो ।
मौन अवधि शुरु हुनुभन्दा पहिले बिहीबार दलहरुले शक्ति प्रदर्शन गर्नका लागि सभाहरु गर्ने गर्दछन् । बिहीबार पहिलो चरणमा निर्वाचन हुँदै गरेका ३२ जिल्लामा त्यस्ता सभाहरु भए ।

मौन अबधि : दलमात्र हैन, मिडिया पनि चुप

मौन अवधिमा राजनीतिक दल, उम्मेदवार मात्र हैन सञ्चारमाध्यमहरुलाई पनि आचारसंहिता बनाइएको छ । सो आचारसंहितामा यो अबधिमा उम्मेदवारको अन्तरवार्ता, व्यक्तिगत विवरण, दलको घोषणापत्रको चर्चालगायतका सामग्रीहरु प्रकाशन प्रशारण नगर्न भनिएको छ । संविधान सभा सदस्य निर्वाचन आचार संहिता २०७० को बुँदा नं ९३ ले ७२ घण्टे मौन अवधिका विषयमा पत्रपत्रिका लगायतका सञ्चारमाध्यमले निर्वाह गर्नुपर्ने दायित्वका बारेमा भनेको छ, ‘आम सञ्चारले मौन अवधिमा कुनै राजनीतिक दल वा उम्मेद्वारको निर्वाचनको प्रचार प्रसार हुने गरी सूचना वा समाचार सम्प्रेषण, प्रकाशन र प्रशारण गर्नुहुँदैन ।’

यो पाली मौन अबधिमा सामाजिक सञ्जालमा समेत प्रचार गर्न नपाइने निर्वाचन आयोगले जनाएको छ । मौन अवधि सुरु भएपछि निर्वाचन सम्पन्न नहुन्जेलसम्म राजनीतिक दल, दलका तर्फबाट उम्मेदवार भएका व्यक्तिहरू, राजनीतिक दलका पदाधिकारीहरू, स्वतन्त्र उम्मेदवारहरू, नागरिक समाज, आम मतदाता तथा सञ्चार माध्यमले कुनै पनि प्रकारका चुनावी प्रचार प्रसारमा संलग्न हुन नपाइने व्यवस्था रहेको छ ।

उता, मंसिर १० गते पहिलो चरणमा निर्वाचन हुने नेपाल–भारतका सिमावर्ती क्षेत्रका नाका निर्वाचनलाई ध्यानमा राखेर बिहीबार रातिदेखि बन्द गरिने भएको छ ।
निर्वाचनलाई शान्तिपूर्ण रुपमा सम्पन्न गराउन, आपराधिक गतिविधि नियन्त्रण गर्न र निर्वाचन हुनुअघि ७२ घन्टासम्म नेपाल भारत सीमा बन्द गरिएको हो । साथै निर्वाचनलाई मध्यनजर नेपाल र भारतका सुरक्षाकर्मीले संयुक्त सुरक्षा गस्ती शुरु गरेका छन् । हरेक निर्वाचनको समयमा सिमाहरु बन्द गर्ने गरिदै आएको छ ।
यसैबिच आसन्न प्रदेश र प्रतिनिधी सभाको पहिलो चरणमा मंसिर १० गते निर्वाचन हुने ३२ जिल्लाका शैक्षिक संस्थाहरु पनि बन्द भएका छन् । धेरै जसो शैक्षिक संस्थामा मतदान केन्द्र रहेकाले सबै शैक्षिक संस्था बन्द गर्नुपरेको शिक्षा मन्त्रालयले जनाएको छ ।

प्रतिक्रिया दिनुहोस्