Logo

राष्ट्रियसभा गठन अध्यादेशमा सहमति जुटाउन ओली–प्रचण्डलाई राष्ट्रपतिको सुझाव


काठमाडौं । राष्ट्रपति विद्यादेवी भण्डारीले राष्ट्रियसभा निर्वाचन सम्बन्धी अध्यादेशमा राजनीतिक सहमती खोज्न नेकपा एमाले र माओवादी केन्द्रका शीर्ष नेतालाई आग्रह गरेकी छिन्। तर एमाले र माओवादी नेताहरुले भने राजनीतिक दुरासायले आएको अध्यादेश स्वीकार नगर्न भन्दै राष्ट्रपतिलाई दबाब दिएका थिए ।

अध्यादेश पारित नभएसम्म नेपाली कांग्रेसले सरकारबाट राजीनामा नदिने बताएपछि एमाले अध्यक्ष केपी ओली र माओवादी केन्द्रका अध्यक्ष पुष्पकमल दाहाल बुधबार बिहानै राष्ट्रपतिलाई भेट्न शितल निवास पुगेका थिए। नयाँ सरकार गठनका लागि वर्तमान सरकारले राष्ट्रियसभा निर्वाचन सम्बन्धी अध्यादेश पारित गर्नुपर्ने बताउँदै आएको छ।

निर्वाचनपछिको ठूलो दल बनेको एमालेले राष्ट्रियसभा गठनको विषयलाई लिएर नयाँ सरकार गठनमा सरकारले बखेडा झिक्न खोजेको आरोप लगाउँदै आएको छ। एमाले अध्यक्ष ओली र माओवादी केन्द्रका अध्यक्ष दाहालसँगको भेटमा राष्ट्रपति भण्डारीले आपसी समझदारीबाट अघि बढ्न आग्रह गरेकी हुन्।

विभिन्न राजनीतिक विवादलाई सहमतीबाट हल गरेका प्रमुख दलले अहिलेको विवाद पनि सहमतीका साथ टुंग्याउन सुझाव दिएको राष्ट्रपतिका मुख्य सचिव भेषराज अधिकारीले नेपाल लाइभलाई बताए। सबै संवैधानिक अंगले तोकेको दायित्व पूरा गर्न सक्षम हुने बताउँदै राष्ट्रपतिले आफूलाई विवादमा पार्ने काम नगर्न सुझाव दिएको अधिकारीले बताए।

प्रतिक्रिया दिनुहोस्