एक हप्तादेखि लागेको डढेलो अझै नियन्त्रण बाहिर
काठमाडौं । पर्साको जङ्गलमा विगत एक हप्तादेखि लागेको डढेलो अझै नियन्त्रणमा आउन सकेको छैन । डढेलो लागेको एक हप्ता भइसक्दा पनि त्यसलाई निभाउन सम्बन्धित निकायले पहल नगरेको स्थानीयवासीले गुनासो गरेका छन् ।सेक्टर बन कार्यालय वसन्तपुर, इलाका वन कार्यालय हरैया, भतौडा र रङ्गपुर, सेक्टर बन कार्यालय बढ्नियार तथा पर्सा राष्ट्रिय निकुञ्जको महादेव पोस्ट, चारभैया पोस्ट गडुवालाइन, निर्मल बस्ती पोस्ट, पन्चमुखी सामुदायिक बन र सुनाखरी उपभोक्ता समिति अन्तर्गत रहेको बन क्षेत्रमा विगत १ हप्ता देखि डढेलो लागेको हो ।
डढेलोका कारण करोडौँ मूल्य बराबरका काठ तथा बोटबिरुवा जलेर नष्ट भएको स्थानीय बासिन्दाले बताएका छन् । आगलागीबाट निस्केको धुवाँले जङ्गल नजिकैका मानव बस्तीहरूमा समेत असर पारेको छ । डढेलोको धुवाँले जङ्गलको नजिकै रहेका बस्तीका स्थानीयहरूमा आँखा चिलाउने, आँखा रातो हुने, बिहानको समयमा धुवाँले अँध्यारो हुने जस्ता समस्या देखिएको छ । नेपाल प्रहरी, सशस्त्र प्रहरी, नेपाली सेना र बन रक्षकको टोली परिचालन गरिएको र बाकी स्थानको पनि आगो नियन्त्रणको लागि जिल्लाले निर्देशन दिइसकेको स्रोतले जानकारी दिएको छ ।
जङ्गलमा लागेको आगो नियन्त्रण गर्न बन कर्मचारी र प्रहरीले मात्रै नसक्ने भएकोले स्थानीयवासीको पनि सहयोग आवश्यक रहेको छ । यसैबिच सुनाखरी उपभोक्ता समिति र पन्चमुखी सामुदायिक बनमा लागेको डढेलो निभाउन स्थानीयवासी नै खटेका छन् ।
