Logo

सूर्यबाट चुनाव लड्दा ३० सिट चाहिने राप्रपाको माग


कमल थापा नेतृत्वको राष्ट्रिय प्रजातन्त्र पार्टी नेपाल (राप्रपा नेपाल)ले नेकपा एमालेको सूर्य चिह्नबाट स्थानीय तह निर्वाचनमा प्रतिस्पर्धा गर्ने सहमति भएसँगै अब भागबण्डा कसरी मिलाउने भन्नेबारे छलफल केन्द्रीत भएको नेताहरुले बताएका छन् । एमालेसँगको वार्ताका क्रममा राप्रपा नेपालले कम्तिमा ३० स्थानीय तहमा दाबी गरेको छ । देशभरका स्थानीय तहमध्ये विभिन्न जिल्लाका स्थानीय तहमा पार्टीको जनाधार रहेको दाबीसहित राप्रपाले ३० स्थानीय तहमा आफ्नो दाबी गरेको हो । यद्यपि दुबैपक्षबीच केन्द्र तथा जिल्लाका साथै स्थानीयस्तरमा समेत छलफल र मत विश्लेषणका आधारमा उम्मेदवार उठाउने समझदारी भएको छ । 

राप्रपा नेपालका महामन्त्री तथा स्थानीय निकाय परिचालन विभागका प्रमुख सुशील श्रेष्ठले बुधबार तालमेलबारे ५ बुँदे सहमति भएसँगै एमालेको सूर्य चिह्नबाटै चुनाव लड्न निश्चित भएको बताए । राप्रपा नेपालको चुनाव चिह्न तीर भएपनि सहमतिअनुसार अब राप्रपाले जहाँ–जहाँ उम्मेदवार उठाउँछ त्यहाँ सबै सूर्य चुनावबाटै उम्मेदवार बन्नेछन् । तर, चुनाव जितेपछि उनीहरु राप्रपा नेपालकै हैसियतमा रहने गरी सहमति भएको छ ।

प्रतिक्रिया दिनुहोस्