१० लाख ८२ हजार नगद सहित दुईजना लागुऔषध काराेबारी पक्राउ

इलाम,२० भदाै ।  इलाका प्रहरी कार्यालय धुलाबारी र लागुऔषध नियन्त्रण ब्युरो काँकडभिट्टाबाट खटिएको संयुक्त प्रहरी टोली स्रोत नखुलेको साढे १० लाख बढी रकमसहित दुईजनालाई पक्राउ गरेको छ । पक्राउ पर्नेहरूमा मेचीनगर नगरपालिका–१५ स्थित निलकोठी निवासी ३० वर्षीया अप्सरा खातुन (राजवंशी) र ४३ वर्षीय मोहम्मद मोसाद आलम रहेका छन् । लागुऔषध ब्राउन सुगर बरामद गर्न प्रहरी टोली विशेष सूचनाको आधारमा आइतबार बिहान ११ बजे अप्सराको घरमा पुगेको थियो।

अप्सराको घरमा लागुऔषध बरामद नभए पनि ब्राउन सुगर नाप्ने मिनी डिजिटल तराजु दुई थान र नगद १० लाख ८२ हजार ५ सय रुपैयाँ बरामद गरिएको प्रहरी कार्यालय झापाका प्रहरी निरीक्षक कैलाश अधिकारीले जानकारी दिए । पक्राउ परेका दुवैजनालाई इलाका प्रहरी कार्यालय धुलाबारीमा राखेर थप अनुसन्धान अघि बढाइएको छ ।

यता प्रहरीका अनुसार केही दिनअघि काठमाडौंमा २४० ग्राम ब्राउन सुगरसहित एक महिला पक्राउ परेकी थिइन् ।ती महिलाले झापाकी अप्सराबाट ब्राउन सुगर खरिद गरी ल्याएको प्रहरीलाई बयान दिएकी थिइन् । सोही बयानको आधारमा काठमाडौं प्रहरीले झापा प्रहरीलाई अप्सरालाई पक्राउ गर्न पत्राचार गरेको थियो ।