काठमाडौँ ।

चीन सरकारको आर्थिक सहयोगमा विस्तार हुन लागेको चक्रपथको दोस्रो खण्डमा भविष्यमा आवश्यक संरचना बनाउँदा भत्काउनु नपर्ने गरी त्यसका लागि स्थान राख्न लागिएको छ ।

आगामी दिनमा सरकारले चाहँदा चक्रपथमा मेट्रो रेल, मोनो रेल वा अन्य कुनै संरचना बनाउन सकिने गरी केन्द्रमा कम्तीमा ३ मिटर खाली ठाउँ राखिने गरी छलफल भइरहेको सडक विभागले जनाएको छ ।

त्यो क्षेत्रमा ‘डेडिकेडेट’ बस लेन वा अन्य कुनै प्रयोजनका लागि प्रयोग गर्न सकिने विभागका महानिर्देशक सुशीलबाबु ढकालले बताए । अहिले सडक सुरक्षाको पनि काम गर्छ भनेर कम्तीमा ३ मिटर राख्न लागिएको हो ।

त्योभन्दा दायाँबायाँ ४–४ लेनको सडक हुने र छेउछेउमा पैदल यात्रुका लागि हिँड्ने मार्ग बनाउन लागिएको उनले बताए । पैदल मार्गभन्दा मुनि ‘युटिलिटी करिडोर’ राख्ने गरी छलफल भइरहेको छ ।

उनले भने, ‘पैदल मार्ग छेउमा ग्रिन बेल्ट बनाउने र त्योभन्दा पनि छेउमा सर्भिस लेन बनाउने गरी छलफल भइरहेको छ ।’ सडकको बीचको भाग ३८ मिटरमा ४ लेनसहितको सडक र पैदल मार्ग निर्माण हुनेछ ।

भविष्यमा कुनै पनि सुधार, विस्तार, चुस्त सडक व्यवस्थापनका लागि चाहिने संरचना बनाउनका लागि अहिले बनेको संरचनालाई बाधा नपर्ने गरी डिजाइन गर्नुपर्छ भनिएको महानिर्देशक ढकालले बताए । चक्रपथको पहिलो खण्ड (कोटेश्वरबाट कलंकीसम्मको सडक) मा निर्माण सम्पन्न भएको केही वर्षमा नै कहिले आकाशे पुल त कहिले ‘फ्लाई ओभर’ निर्माणका लागि संरचना बिगार्नुपरेको छ ।

कलंकीदेखि बसुन्धारासम्मको सडक चीन सरकारले निर्माण गर्ने गरी फाइनल डिजाइनको क्रममा छ । आवश्यक स्थानमा संरचना निर्माण अहिले भर्खरै चिनियाँ पक्षले नगरे पनि भविष्यमा बनाउन सकिने गरी डिजाइन गर्ने सहमति भएको छ । उनले भने, ‘उसको डिजाइनमा निर्माण हुन्छ र खर्च सरकारले गर्ने गरी छलफल भइरहेको छ ।’

यो खण्डमा ‘फ्लाई ओभर’लगायत संरचना नबन्न सक्ने उनले बताए । ‘सर्भिस लेन’को सवारीसाधन मुख्य लेनमा नआउने गरी डिजाइन गर्न लागिएको विभागले जनाएको छ । चक्रपथको पहिलो खण्डमा चीन सरकारले जम्मा ३ वटा आकाशे पुल निर्माण गरेको थियो भने सरकारले पछि ६ वटा आकाशे पुल निर्माण गरेको थियो । दोस्रो खण्डमा यात्रुलाई सडक पार गर्न कुन संरचना ठिक हुन्छ भनी छलफल भइरहेको छ ।

चक्रपथको पहिलो खण्डभन्दा डिजाइनका हिसाबले दोस्रो खण्ड केही फरक बन्न सक्ने देखिएको सडक विभाग, विकास सहायता समन्वय महाशाखाका प्रमुख डा. विजय जैसीले बताए । पहिलो खण्डमा बीचमा दुइटा आउने र दुइटा जाने गरी ४ लेन थियो । बीचमा दुवैतर्फको सडक र दायाँबायाँ लाग्न सर्भिस लेन थियो । अहिले एकातर्फबाट आउने र अर्काे तर्फबाट जाने मात्रै निर्माण गर्न छलफल भइरहेको छ ।

निर्माण स्थल खाली हुँदै गर्दा चिनियाँ पक्षले निर्माणका लागि छलफल अघि बढाएको हो । अहिलेसम्म चिनियाँ पक्षले निर्माण गर्ने लेनमा झन्डै ८० प्रतिशत खाली गरिएको छ । पहिले चाबहिल नजिकै धोबीखोलासम्म विस्तार गर्ने योजना बनाइएको भए पनि निर्माण स्थल खाली गर्न नसकिएकाले कलंकीबाट बसुन्धारासम्म मात्रै विस्तारको योजना अघि बढाइएको हो ।