काठमाडौं।
एप्पलले मंगलबार वोन्डरलस्ट इभेन्ट मार्फत आइफोन १५ सिरिजका चार मोडल लन्च गर्ने भएको हो ।
नेपाली समय अनुसार आज राति १०ः४५ बजे एप्पलले वोन्डरलस्ट इभेन्ट गरी एप्पलका एसेसोरिज र आइफोन १५ सार्वजनिक भएको हो ।
यस इभेन्ट मार्फत एप्पलले आइफोन १५का चार भेरियेन्ट– आइफोन १५, आइफोन १५ प्लस, आइफोन १५ प्रो र आइफोन १५ प्रो म्याक्स लन्च गर्नेछ । यसका साथै एप्पलले एप्पल इयरपोड्स, न्यु जेनेरेसनका एप्पल वाच समेत सार्वजनिक गर्नेछ ।
क्यालिफोर्नियामा रहेको स्टिभ जब्स थ्रियटरमा हुने इभेन्टको मुख्य आकर्षण भने आईफोन १५ सिरिज हो । अघिल्लो वर्ष सार्वजनिक भएको आईफोन १४ मा ब्याट्री हेल्थ चाँडै घटेको भन्दै प्रयोगकर्ताले गुनासो गरे पछि, आईफोन १५ का मोडेलहरूका लागि एप्पलले विशेष सतर्कता अपनाएको छ ।
आइफोन १५ का बारेमा कम्पनीले कुनै जानकारी बाहिर ल्याएको छैन । तथापि विभिन्न सूचनामार्फत सार्वजनिक भएको जानकारी अनुसार आइफोन १५ सिरिज अन्तर्गतका मोबाइल फोनहरुको विशेषता यस प्रकार रहेको छ ।
डिजाइन
आईफोन १४ को प्रो र प्रो म्याक्स मोडेलमा मात्र उपलब्ध डाइनामिक आइल्यान्ड फिचर आईफोन १५ का सबै लाइनअपमा हुनेछ । आईफोन १५ प्रो र १५ प्रो म्याक्सलाई हलुंगो बनाउन एप्पलले स्टेनलेस स्टिल हटाएर टाइटानियमको प्रयोग गर्ने विभिन्न स्रोतको टिप्पणी रहेको छ । यससँगै आइफोन १५ अन्य मोडलको तुलनामा पातलो, हलुका हुने बताइएको छ ।
कलर
आईफोन १५ र आईफोन १५ प्लस एउटै कलरमा उपलब्ध हुनेछन् । विशेषगरी मिडनाइट ब्ल्याक, स्टारलाइट ह्वाइट, रेड, लाइट ब्लु र लाइट पिङ्क कलरमा उपलब्ध हुनेछ । आईफोन १५ प्रो र प्रो म्याक्स मोडेल भने टाइटन ग्रे, डार्क ब्लु, सिल्भर र स्पेस ब्ल्याक कलरमा उपलब्ध हुने बताइएको छ ।
प्रोसेसर
एप्पलले हरेक नयाँ मोडेल सार्वजनिक गरेसँगै नयाँ प्रोसेसर उपलब्ध गराउने गर्छ । गत वर्ष आईफोन १४ प्रो र प्रो म्याक्समा दिइएको ए १६ बायोनिक चिपसेट अब आईफोन १५ र आईफोन १५ प्लस उपलब्ध हुनेछ । आईफोन १५ प्रो र १५ प्रो म्याक्समा भने एप्पलको नयाँ प्रोसेसर ए१७ बायोनिक चिप रहनेछ ।
र्याम तथा स्टोरेज
आईफोन १५ मा एप्पलले उपलब्ध गराउने उच्चतम र्याम ६ जीबी हो । तर, ८ जीबी र्याम उपलब्ध गराउन सक्ने सम्भावना पनि उत्तिकै छ । इन्टर्नल स्टोरेजको सन्दर्भमा यो वर्ष एप्पलले आईफोन १५ प्रो र प्रो म्याक्समा २५६ जीबी, ५१२ जीबी, १ टीबी र २ टीबी इन्टर्नल स्टोरेज उपलब्ध गराउने अपेक्षा गरिएको छ । आईफोन १५ र १५ प्लस भने १२८ जीबी, २५६ जीबी र ५१२ जीबी इन्टर्नल स्टोरेज भेरियन्टमा उपलब्ध हुनेछ ।
क्यामेरा
क्यामेराको सन्दर्भमा आईफोन १५ र आईफोन १५ प्लसमा ४८ मेगापिक्सेलको मुख्य र १२ मेगापिक्सेलको अल्ट्रावाइड एङ्गल लेन्स हुनेछ । आईफोन १५ प्रोमा ४८ मेगापिक्सेलको मुख्य, १२ मेगापिक्सेलको अल्ट्रावाइड र १२ मेगापिक्सेलको टेलिफोटो लेन्स हुने बताइएको छ । आईफोन १५ प्रो म्याक्समा भने ४८ मेगापिक्सेलको सोनी आईएमएक्स ९०३ सेन्सर, १२ मेगापिक्सेलको अल्ट्रावाइड एङ्गल लेन्स र १२ मेगापिक्सेलको टेलिफोटो पेरिस्कोप लेन्स रहनेछ । यी सबै मोडेलमा १२ मेगापिक्सेलको सेल्फी क्यामेरा उपलब्ध हुने लिकरले उल्लेख गरेका छन् ।
ब्याट्री र चार्जिङ
आईफोन १५ मा ३८७७ एमएएच क्षमताको ब्याट्री हुनेछ भने १५ प्लसमा ४९१२ एमएएच क्षमताको ब्याट्री हुनेछ । आईफोन १५ प्रोमा ३६५० एमएएच र आईफोन १५ प्रो म्याक्समा ४८५२ एमएएच क्षमताको ब्याट्री हुने बताइएको छ । यी दुई मोडेलमा मात्र यूएसबी –सी पोर्ट उपलब्ध हुने सम्भावना छ ।
मूल्य
आईफोन १५ लाइनअपको मूल्य अघिल्ला मोडेलहरूको तुलनामा केही बढी हुने चर्चा छ । विभिन्न स्रोतलाई आधार मान्ने हो भने आईफोन १५ को मूल्य ७९९ डलर, आईफोन १५ प्लसको मूल्य ८९९ डलर, आईफोन १५ प्रोको मूल्य १०९९ डलर र आईफोन १५ प्रो म्याक्सको मूल्य १२९९ डलरबाट सुरु हुने छ ।
प्रतिक्रिया