चितवन ।

भरतपुर महानगरपालिका–२० स्थित चनौलीको एक मासु पसलले खसीको भनेर बाख्रीको मासु बिक्री गरेको पाइएको छ।

भरतपुर महानगरपालिकाबाट गएको बजार अनुगमन टोलीले बिहीबार मुस्कान मासु पसलले बाख्रीको मासु बेचिरहेको अवस्थामा फेला पारेको हो।

करिब १५ किलो बाख्रीको मासु बरामद गरेर वडा अध्यक्षको रोहबरमा नष्ट गरिएको बजार अनुगमन समितिका संयोजक विष्णु भुजेलले जानकारी दिए।

मासुलाई पहेँलो बनाउनको लागि अखाद्य रंग प्रयोग गरेको पाइएको छ। सो रंग पूजाका लागि प्रयोग गरिने संयोजक भुजेलले जानकारी दिए।

खसीको भनी बाख्रीको मासु बेच्ने पसलेलाई पहिलो चरणमा सचेत गराएर महानगरमा उपस्थित हुन भनिएको उनले बताए।