बागलुङ ।

पैदलयात्रा गरिरहेका बटुवाले पसिना पुछ्दै सोध्छन्- ‘यो पुल कहिले बन्छ ? ’ उकाली र ओराली गर्दै झोलुङे पुलको सहारामा कालीगण्डकी नदी वारपार गरेपछि लाग्दो हो पुल बने मोटरमा सहजै जाने-आउने हुन्थ्यो।

घाट पुगेका मलामीले हरेक वर्ष सोध्छन्- ‘यो पुल अझै बनेन्रु कहिले बन्छ होला है ?’ बागलुङको जैमिनी नगरपालिका-१ कुश्मीशेराको जैमिनीघाटमा बागलुङ-पर्वत जोड्ने झोलुंगे पुलको छेवैमा व्यवसाय गरेर बसेका हरि केसीले सुन्दै आएका प्रश्न हुन् यी।

बर्खामा उर्लिने हिउँदमा निरन्तर बगिरहने कालीगण्डकीमा पक्की पुल बन्न थालेको ७ वर्ष बित्यो। कहिले फलामका रड मात्रै ठडिएका देखिन्छन्, कहिले पिल्लर बनिसकेका देखिन्छन्। अहिलेसम्म पुलले सानोतिनो आकार मात्र लिएकाले पुल बनिहाल्छ जस्तो नलाग्ने सर्वसाधारण बताउँछन्।

जैमिनी-१ कुश्मीशेरा र पर्वतको फलेवास जोड्ने गरी कालीगण्डकी नदीमाथि निर्माणाधीन पक्की पुलको काम सात वर्षदेखि चलिरहेको छ। ‘विभिन्न कारणले लामो समयदेखि काम अगाडि बढ्न सकेन। अघिल्लो वर्ष धेरै काम भएको छ। अब २० प्रतिशत काम मात्रै बाँकी छु, सडक डिभिजन कार्यालय बागलुङका इन्जिनियर किरण पोखरेलले भने, ‘कठिन काम सकियो। निर्माण कम्पनीको म्याद पनि सकिएको छ। म्याद र बजेट थप भए अबको एक वर्षमा पुल निर्माण सम्पन्न हुन्छ।’

उनले ५ वर्षसम्म अलपत्र रहेको कामले अघिल्लो वर्ष गति लिएको बताउँदै अघिल्लो वर्ष मात्रै ४५ प्रतिशत काम भएको जानकारी दिए। पोखरेलका अनुसार त्यसभन्दा अघिको वर्ष करिब ३५ प्रतिशत काम भएको थियो।

‘पुलका पिल्लर बनिसकेका छन्। ढलान स्लापको काम बाँकी हो। आसपासका एप्रोज रोड र पुल जोगाउन तारजालीको लागि भिओ गर्नुपर्ने छु, पोखरेलले भने, ‘कुल बजेटको १५ प्रतिशत भित्रै हुने गरी भिओ बनाउने योजना छ। भिओ भएको बजेट स्वीकृत हुँदा आगामी असारसम्म पुल तयार हुन्छ।’

जैमिनी-१ कुश्मीशेरा र पर्वतको फलेवास नगरपालिका-६ देविस्थान जोड्ने गरी विसं २०७३ असोज ९ गतेदेखि पुल निर्माण थालिएको थियो। प्राविधिक कारणले लामो समयसम्म काम रोकिएको थियो। काम थालेको पाँच वर्षसम्म ३५ प्रतिशत भौतिक प्रगति रहेकामा गत आवमा भएको कामसमेत गरेर ८० प्रतिशत भौतिक प्रगति भएको निर्माण कम्पनीले जनाएको छ।

बागलुङ र पर्वत दुवैतर्फ पुल जोडिने संरचनाको काम सकिएको छ। कालीगण्डकी नदीको बीचमा दुईवटा पिल्लर तयार भएका छन् । पाँचौँ पटक म्याद थपका लागि निवेदन दर्ता गराएको निर्माण कम्पनीले जनाएको छ।

‘कामको गति हेर्दा म्याद नथप्नुपर्ने कुनै कारण छैन्’, इन्जिनियर पोखरेलले भने, ‘भिओ स्वीकृत हुने नहुने मुख्य प्रश्न हो।’ उनका अनुसार १३ करोड १२ लाख ४९ हजार तीन सय ६४ रूपैयाँमा ३० महिनाभित्र काम सक्नेगरी सम्झौता भएको थियो। बागलुङ-पोखरा राजमार्गको विकल्पको रुपमा पर्वतको फलेवास, कार्कीनेटा, स्याङ्जा हुँदै पोखरा जोड्ने वैकल्पिक सडकलाई बागलुङको दक्षिण क्षेत्रसम्म जोड्न यो पुल आवश्यक छ।

समयमै पुल नबन्दा तीन वर्ष अघि भदौमा आएको पहिरोले मध्यपहाडी लोकमार्ग एक साता अवरुद्ध हुँदा बागलुङवासीले वैकल्पिक मार्गको प्रयोग गर्न नपाएको स्थानीय हरि केसीले बताए। कालीगण्डकी करिडोरमा जोडिने यो पुलले पर्वत, स्याङ्जा र पोखरालाईसमेत करिडोरको पहुँचमा ल्याउने उनको भनाइ थियो। उनका अनुसार ऐतिहासिक जैमिनीधाम क्षेत्रमा निर्माण भइरहेको पुलले पर्वत र बागलुङका आर्थिक, सामाजिक र धार्मिक क्रियाकलापमा प्रभाव राख्छ।

पुल बनेमा मध्यपहाडी लोकमार्गको बागलुङ(पोखरा खण्डमा आउने समस्याका कारण यात्रुले सास्ती खेप्नुपर्दैन।