काठमाडौँ ।
पशुपतिनाथ परिसर बाग्मती किनारमा नित्य रूपमा हुँदै आएको साँझको आरतीको भिडियो अब सर्वसाधारणले खिच्न नपाउने भएका छन् ।
भिडियो खिचेर कसैले फेसबुक, इनस्टाग्राम वा युट्युबमा राखे डिजिटल कपिराइट ऐनअन्तर्गत कारबाही हुने बुढासुब्बा डिजिटल प्रालिले बताएको छ ।
एक सूचना जारी गर्दै बुढासुब्बा डिजिटल प्रालिले यसबारे जानकारी गराएको हाे । उक्त सूचनामा भनिएको छ, ‘यस पशुपतिनाथ आर्यघाट क्षेत्रको बाग्मती नदी किनारमा हुने गंगा आरती र कोर क्षेत्रमा हुने दीप प्रज्वलनको भिडियो खिच्न सख्त मनाही छ । यहाँ खिचिएका भिडियो समग्री फेसबुक, इन्स्टाग्राम,टिकटक तथा युट्युबमा व्यावसायिक प्रयोजनका लागि राखिएको थाहा भएमा डिजिटल कपिराइट ऐनअन्तर्गत कारबाही हुने जानकारी गराइन्छ ।’
पशुपतिमा हुने नित्य आरतीको भिडियो खिच्ने र प्रसारण गर्ने एकाधिकार अहिले बुढासुब्बा डिजिटल प्रालिले पाएको र यसका लागि पशुपति क्षेत्र विकास कोषमार्फत् स्वीकृत पाएको बुढासुब्बा डिजिटल प्रालिले बताएको छ ।
योसँगै पशुपति क्षेत्र विकास कोषको यस कदमप्रति विवाद पनि सुरु भएको छ । पशुपति एवं बाग्मती गंगा आरती सेवा समितिले सञ्चालन गर्दै आएको आरतीमा पशुपति क्षेत्र विकास काेषले डिजिटल राइट्स बेचेको भन्दै केही अभियान्ताले यसको विरोध गरिरहेका छन् ।
हरेक साँझ पशुपति मन्दिरभित्रको आरती सकिएपछि बाग्मती नदी किनारको आरती हुन्छ । २०६४ साउन २१ गते आधिकारिक रूपमा ‘श्री पशुपति एवं बाग्मती गंगा आरती सेवा समिति’ स्थापना गरी दैनिक रूपमा आरती हुँदै आएको छ ।
प्रतिक्रिया