नारायणगढ ।

नारायणगढ–मुग्लिन सडकखण्डको तुइन खोलामा पुल बनाउन सवारीसाधन रोकेर भित्तो काट्ने काम अन्तिम चरणमा पुगेको छ। विस्फाेट गराउनका लागि प्रक्रिया अगाडि बढाइरहेका वेला अन्तिम प्रयासका रूपमा थालिएको भित्तो काट्ने काम अन्तिम चरणमा पुगेको हो।

सवारीसाधन दैनिक चार घन्टा रोकेर गत पुस ७ गतेदेखि काम भएको छ। मध्याह्न १२ बजेदेखि अपराह्न ४ बजेसम्म सवारीसाधन रोकेर काम गरिँदै आइएको छ। नागढुंगा–मुग्लिन सडक आयोजना पश्चिमखण्ड (नारायणगढ–मुग्लिन)का सूचना अधिकारी ई. कृष्ण आचार्यका अनुसार ६० मिटर अग्लो भित्तोको एकातर्फको भाग ११ मिटर र अर्कोतर्फ १४ मिटर तल झरेको छ। उनका अनुसार मुग्लिनतर्फ १४ मिटर बाँकी छ भने खोलातर्फ ११ मिटर बाँकी छ। उनले भने, ‘भित्तो काट्ने काम झन्डै ८० प्रतिशत सम्पन्न भयो।’

पहिलोपटक तीन साता सवारीसाधन रोकेर भित्तो काटिएको थियो। काम नसकिएपछि दोस्रोपटक थप गरिएको तीन साता यही माघ २० गते सकिँदै छ। दोस्रोपटक म्याद थपेपछि चार दिन काम गर्न नपाएको भन्दै उनले थोरै दिन मात्रै थप गर्नुपर्ने हुन सक्ने बताए। उनको भनाइमा माघभित्रमा भित्तो काट्ने सबै काम सकिन्छ।

पहाडको भाग अरू तल झरेपछि जाली लगाएर भित्तो काट्दा सवारीसाधन रोक्नुपर्दैन। आक्कलझुक्कल थोरै समय रोकेर काम गर्नुपर्ने अवस्था आए पनि यसरी सवारीसाधन रोक्न नपर्ने उनले बताए। काम प्रभावकारी हुँदै गएको भन्दै उनले विस्फोट गर्नुपर्ने अवस्था टरेको बताए।

आचार्यका अनुसार ६० मिटर अग्लो पहाड गत वर्ष २५ मिटर काटिएको थियो। बाँकी ३५ मिटर रक स्प्लिटर र हाइड्रोलिक ज्याक हेम्भर प्रयोग गरेर फोर्दै आइएको छ। उनका अनुसार टनेल, खानीलगायतमा प्रयोग गरिने विधि प्रयोग गरेर अन्तिम प्रयास गरिएको हो।

सो सडकका १९ पुलमध्ये चार पुल चार वर्षअघि निर्माण गरिएको थियो। बाँकी १५ पुल एकैसाथ ठेक्का लगाइएको थियो। ०७६ चैत १० गतेदेखि पुलको निर्माण थालिएको हो। पुलको लागत रु. एक अर्ब २८ करोड छ। अनक कन्स्ट्रक्सनले पुलको काम गरिरहेको छ । हालसम्म आठ पुल सञ्चालनमा आइसकेका छन् ।

जुगेडी–खहरी र सिमलतालका तीन पुल एक महिनाभित्रमा सञ्चालनमा आउने आचार्यले जानकारी दिए। उनका अनुसार काली र नाम्चे खोलाको पुल थप तीन महिनामा सञ्चालनमा आउनेछन् । मुग्लिन नजिकको १ नम्बर पुल असारसम्ममा सञ्चालनमा आउने उनले बताए। अहिले भित्तो काट्दै गरेको ३ नम्बर पुल जग खनेको ६ महिनाभित्रमा सम्पन्न गर्नेगरी काम गर्ने निर्माण व्यवसायीले प्रतिबद्धता जनाएको आचार्यले बताए।

यो राजमार्गलाई एसियाली विकास बैंक (एडिबी)को सहयोगमा एसियन मापदण्डअनुसार बनाइएको हो। पुल ११ मिटर चौडा छ। सडक विस्तार गरेसँगै नौदेखि ११ मिटर फराकिलो बनेको छ। राजधानी बाहिरिने र भित्रिने प्रमुख सडकका रूपमा यो सडक रहेको छ। यो सडक हुँदै दैनिक १० हजारभन्दा बढी सवारीसाधन आवतजावत गर्छन्।