काठमाडौं ।

सुमेरू सेभिङ एन्ड क्रेडिट कोअपरेटिभ लिमिटेडका पूर्वअध्यक्ष भरत महर्जनविरूद्ध ‘रेड नोटिस’ जारी भएको छ।

सहकारीमा सर्वसाधारणले जम्मा गरेको रकम अपचलन प्रकरणमा केन्द्रीय अनुसन्धान ब्युरो (सिआइबी) ले भरतविरूद्ध अनुसन्धान गरिरहेको थियो।

‘गत शुक्रबार भरत महर्जनविरूद्ध रेड नोटिस जारी गरिएको हो,’ केन्द्रीय प्रवक्ता डिआइजी भीम ढकालले भने।

प्रधान कार्यालय इन्टरपोल शाखामा अनुरोध भएपछि उनीविरूद्ध रेड नोटिस जारी भएको हो।

कुनै एक देशमा अपराध/गैरकानुनी काम गरेर अन्य देशमा भागेकाहरूलाई खोजी गर्न रेड नोटिस जारी गरिन्छ।

सुमेरू सहकारीका कर्मचारीका अनुसार महर्जन बेलायत ‘भागेका’ छन्। सहकारीबाट अपचलन गरेको धेरै सम्पत्ति उनले श्रीमतीका नाममा सारेका छन्। सो सम्पत्ति जोगाउन उनले श्रीमतीसँग नक्कली डिभोर्स गरेका छन्। तर उनकी श्रीमती पनि अहिले उनीसँगै बेलायतमै छिन्।