काठमाडौं । नेकपा माओवादी केन्द्रको बागमती प्रदेशको परामर्श समितिका दोस्रो दिनको बैठक अहिले पार्टी कार्यालय पेरिसडाँडामा बसिरहेको छ। बैठकमा नेताहरूले आआफ्नो धारणा राख्ने क्रममा चलिरहेको छ।

हिजोको बैठकमा अध्यक्षको ब्रिफिङपछि ४० जना नेताहरूले आफ्नो धारणा राखेका थिए। बैठकमा बोल्नेहरूले अध्यक्ष पुष्पकमल दाहाल प्रचण्डलाई आलोचनात्मक सुझाव दिएका छन्। बोल्ने अधिकांश नेताहरूले उपमहासचिव जनार्दन शर्माले राखेको प्रस्तावलाई समर्थन पुग्ने गरी बोलेको एक नेताले बताए।

शर्माले अध्यक्ष प्रचण्डलाई नेतृत्व हस्तान्तरण गर्न लिखित रूपमै हालै बसेको स्थायी कमिटीको बैठकमा प्रस्ताव राखेका थिए। यो प्रस्तावपछि पार्टीभित्रको विवाद समाधान गर्नको लागि विशेष महाधिवेशनमा जानुपर्ने नेताहरूले जोड दिएका छन्।

बैठकमा नेताहरूलाई बोल्न ५र५ मिनेटको समय दिइएको छ। नेताहरूले बोलिसकेपछि अध्यक्ष प्रचण्डले जवाफ दिएर बैठक सकिने बागमती प्रदेश कमिटीका अध्यक्ष सरल सहयात्री पौडेलले बताए ।

प्रचण्डले प्रदेशस्तरबाट परामर्श लिएपछि केन्द्रीय कमिटीको बैठकमा तयार पार्ने दस्ताबेज तयार गर्ने तयारी गरेका छन्।