दोलखा– सरकारको गाउँ गाउँमै प्राविधिक उत्पादन गर्ने अभियान अन्तर्गत दोलखाका करिब आधादर्जन विद्यालयहरूमा सञ्चालित तीन वर्षे सिभिल इन्जिनियरिङ विषयको पढाइ बन्द भएका छन् । अनुमति पाएका यहाँका पाँच विद्यालयमध्ये चार वटामा विद्यार्थी भर्ना हुन नआएपछि पढाइ बन्द भएको बताइएको छ ।

जिरी प्राविधिक शिक्षालय जिरीमा अहिलेसम्म ४८ जनाको कोटामा छ जना विद्यार्थी भर्ना भएका छन् । ग्रेड वृद्धिको नतिजासँगै अरु विद्यार्थी भर्ना हुन आउने झिनो आशा रहेको शिक्षालय प्रमुख कर्म शेर्पाले जानकारी बताए ।

उनका अनुसार तीन वर्ष अघिसम्म कोटा पूरा हुने गरेको थियो । गत वर्ष २१ जना मात्रै भर्ना भए । यो वर्ष छ जनाभन्दा बढी भर्ना हुने आशा झिनो रहेको छ । विद्यार्थी कम हुँदा अनुदान पनि कम आउँछ । कक्षा सञ्चालन सङकटमा पर्न थालेको छ ।

विद्यार्थी भर्ना नहुँदा शैलुङ गाउँपालिकाको दुर्गा माध्यमिक विद्यालयमा गत वर्षदेखि नै यो विषयको पढाइ बन्द भएको छ । विद्यालयका प्रधानाध्यापक बालकृष्ण दाहालले भने, सुरु सुरुमा यो विषय राम्रै लाग्यो । बिस्तारै गहन अध्ययन, खर्चिलो ,रोजगारी पाइनहाल्ने र पालिकाले ५० प्रतिशत विद्यार्थी स्थानीय हुनुपर्ने अन्यथा अनुदान नदिने नीति बनाएपछि झन् जटिल बनेको दाहालले बताए । यो विषय रद्द गरेर विज्ञान विषयको पठनपाठन सुरु गरिएको छ ।

बिगु गाउँपालिकाको बिगु पोलिटेक्निक इन्स्टिच्युटमा पनि यो विषयको पढाइ बन्द भएको छ । प्रिन्सिपल माया शेर्पाले बताइन्। क्रमश ४६, २२ र १२ हुँदै यसपालि विद्यार्थी भर्ना हुन नआएपछि पढाइ बन्द भएको छ । जिल्लामा यो विषय सञ्चालन गर्ने धेरै विद्यालय भए । विद्यार्थीको सहर पस्ने तीव्र चाहना, तीन वर्षे पढाइले पनि रुचि कम भएको देखिन्छ । दुई वर्षमै +१२ उत्तीर्ण गरी विदेश जानेले पनि यो विषय ओझेलमा पर्न थालेको छ ।

सदरमुकामको कालिञ्चोक माध्यमिक विद्यालयमा पनि यो वर्ष भर्ना शून्य रहेको छ । मेलुङ गाउँपालिकाको त्रिभुवन माध्यमिक विद्यालयमा पाँच जना सम्पर्कमा आए पनि भर्ना हुन अझै आएका छैनन् । विद्यालयका प्रधानाध्यापक सन्तोष श्रेष्ठले बताए । क्रमशः २७, २३ र ११ हुँदै भर्ना घट्दै गएकाले यो वर्ष पढाइ बन्द हुने बढी सम्भावना रहेको छ । थोरै विद्यार्थी हुँदा सञ्चालनमा कठिनाइ हुन्छ । विद्यालयले खर्च धान्ने अवस्था छैन ।

वैतेश्वर-४ को नमुना विद्यालय हनुमन्तेश्वर माध्यमिक विद्यालयको हालत पनि उस्तै छ। यहाँ पनि सिभिल अन्तर्गतका विद्यार्थी वर्सेनी घट्दै गएका छन् । सरकारले पूर्ण सहयोग गरी यसप्रति विशेष रुचि बढाउने वातावरण सिर्जना नभए खुलेका प्राविधिकधारका अन्य विषयको पठनपाठन पनि बन्द हुने अवस्थामा पुगेको विद्यालय तथा जिल्लाका शिक्षकहरू बताउँछन्।