काभ्रेपलाञ्चोक । पछिल्लो समयमा लगातारको वर्षाका कारण उत्पन्न विपद्का घटनाहरूमा नेपाली सेनाले प्रभावकारी ढङ्गले हवाई उद्धार कार्यलाई तीव्रता दिएको छ। विशेष गरी पहिरोका कारण घाइते भएका तथा फसेका व्यक्तिहरूको उद्धारमा सेना सक्रिय रहेको छ।

आज काभ्रेपलाञ्चोक, सिन्धुपाल्चोक लगायतका विभिन्न जिल्लामा पहिरोमा फसेका तथा घाइते व्यक्तिहरूलाई सेनाको हवाई साधनद्वारा उद्धार गरिएको छ। यस क्रममा कुल १३७ जनाको उद्धार गरिएको विवरण प्राप्त भएको छ, जसमा ३ जना विदेशी नागरिकसमेत रहेका छन्। काभ्रेपलाञ्चोकको मंगलटार क्षेत्रमा पहिरोमा परेका १२२ जनालाई, जसमा ३ जना विदेशी नागरिक पनि समावेश छन्, धुलिखेल ल्याइएको छ।

यस्तै, पनौतीबाट ४ जना घाइतेलाई उद्धार गरी धुलिखेल अस्पताल पुर्याइएको छ भने सिन्धुपाल्चोकको चौरीदेउराली र दोलालघाट क्षेत्रबाट ३ जनाको हवाई उद्धार गरिएको छ। काभ्रेपलाञ्चोकको तेमाल गाउँपालिकाको वडा नं. २ बाट ८ जना घाइतेलाई पनि सेनाले हेलिकप्टरमार्फत उद्धार गरी अस्पताल पुर्याएको छ। साथै, मंगलटार क्षेत्रमा स्वास्थ्यकर्मीको टोली र राहत सामग्री पनि सेनाले ढुवानी गरेको छ।

नेपाली सेनाले उद्धार र राहत कार्य जारी राखेको छ, र सम्भावित थप क्षतिहरूलाई रोक्न सक्दो प्रयास गरिरहेको छ। विपद् प्रभावित क्षेत्रहरूमा उद्धार तथा राहत कार्यलाई अझ सशक्त बनाउन सेना निरन्तर खटिरहेको बताइएको छ। स्रोतका अनुसार उद्धार कार्य निरन्तर जारी राखिएको छ, र थप प्रभावित क्षेत्रमा पनि सेनाले उद्धार तथा राहत वितरणको योजना बनाएको छ।