काठमाडौं– चीनसँग सीमा जोडिएको नेपालको उत्तरी नाका रसुवा जिल्लाको टिमुरेमा निर्माणधीन रसुवा सुक्खा बन्दरगाह ६५ प्रतिशत निर्माण भएको छ ।

चीन सरकारको आर्थिक तथा प्राविधिक सहयोगमा निर्माणधीन सुक्खा बन्दरगाह निर्माण कार्य तीव्र रुपमा अघि बढेको उद्योग, वाणिज्य तथा आपूर्ति मन्त्रालयअन्तर्गतको नेपाल इन्टरमोडल यातायात विकास समितिले जनाएको छ ।

समितिका कार्यकारी निर्देशक आशिष गजुरेलका अनुसार, हालसम्म सुक्खा बन्दरगाह निर्माणको काम ६५ प्रतिशत सकिएको र आउँदो २०८२ असार मसान्तसम्म सम्पूर्ण निर्माण सम्पन्न गर्ने लक्ष्य रहेको हो । अहिले मध्ये भोटेकोशी खोलातर्फ र सडक तर्फको निर्माण कार्य सम्पन्न भैसकेको छ ।

सडक निर्माण, कार्गो गोदाम, लिटिगेशन गोदाम र इन्सपेक्सन सेडको निर्माण कार्य ९० प्रतिशत सम्पन्न भएको गजुरेलले बताए । उनका अनुसार, प्रशासनिक भवनको निर्माण कार्य पनि ५० प्रतिशत सकिएको छ । हाल इलेक्ट्रिकल, सेनिटरी, खानेपानी तथा पेभमेन्टको काम भइरहेको उनले बताए । रसुवा सुक्खा बन्दरगाहको बाँकी निर्माण कार्य आउँदो २०८२ असार मसान्तसम्ममा सम्पन्न भइसक्ने उनको भनाइ छ ।

चीन सरकारको आर्थिक तथा प्राविधिक सहयोगमा सुक्खा बन्दरगाह निर्माण गर्न नेपाल सरकार, उद्योग वाणिज्य तथा आपूर्ति मन्त्रालय र चीन सरकार वीच १६ अक्टुवर, २०१४ मा अर्थ मन्त्रालयसँग १० अप्रिल, २०१५ मा हस्ताक्षर भएको थियो ।

रसुवा जिल्लाको गोसाईकुण्ड गाँउपालिका–१ टिमुरेमा निर्माणाधीन सुक्खा बन्दरगाह निर्माण गर्न वि.सं २०७६ बैशाख २९ मा चीन सरकार र नेपाल सरकारबीच हस्ताक्षर भएको थियो भने उक्त सुक्खा बन्दरगाह निर्माणको लागि मिति २०७९ फागुन २ गते पूरक सम्झौता भएको थियो ।

जसअनुसार, आयोजनाको कुल लागत १२४ मिलियन आर.एम.वि रहेको छ । करार सम्झौता अनुसार आयोजनाको अवधि मिति २०८२ जेठ २४ ९६ जुन, २०२५० सम्म रहेको छ । यस सुक्खा बन्दरगाह कूल ५०,९०० वर्ग मिटर क्षेत्रफलमा फैलिएको छ ।

सुक्खा बन्दरगाह क्षेत्रमा संयुक्त निरीक्षण सेड, सामान राख्ने गोदाम, लिटिगेशन सेड, क्यान्टिन, प्रशासनिक भवन, ३०० सवारी साधन अट्ने पार्किङ लगायतका भौतिक संरचनाहरूको निर्माण भइरहेको छ ।