काठमाडौँ । एसिसी यू-१९ एसिया कपको तयारीमा रहेको नेपाली यू-१९ टोलीले भारतको कर्नाटक यू-१९ टोलीसँगको पाँचको खेलको सिरिजमा अग्रता लिएको छ।

आइतबार मुलपानीमा भएको तेस्रो खेलमा नेपाली टोलीले १ सय २१ रनको जित निकालेसँगै सिरिजमा २(१ को अग्रता लिएको छ। यसअघि नेपालले दोस्रो खेल जित्दा पहिलो खेलमा कर्नाटक विजयी भएको थियो।

आइतबार नेपालले दिएको २८३ रनको लक्ष्य पछ्याएको कर्नाटक ४०.२ ओभरमा १६१ रनमा अलआउट भयो।

कर्नाटकका लागि ओपनिङ ब्याटर गगन रावले सबैभन्दा बढी ४६ रन जोडे। बलिङमा नेपालका नरेन साउदले ४ विकेट लिए। उनले ९।२ ओभरमा १ मेडन राख्दा २५ रन दिए।

युवराज खत्रीले ३ विकेट लिए भने अपराजित पौडेलले १ विकेट लिए।

त्यसअघि कर्नाटकले टस जितेर फिल्डिङ रोजेपछि ब्याटिङको निम्तो पाएको नेपालले ६ विकेटको क्षतिमा २८२ रन जोड्यो।

उनले नेपालका लागि तीन ब्याटरले अर्धशतक प्रहार गरे। ओपनिङ ब्याटर मयन यादवले ९८ बल खेलेर ६ चौका र २ छक्का प्रहार गरेर ५८ रन बनाए।

रोशन विकले नटआउट ८१ रन र उत्तम मगरले ५२ रन बनाए। रोशनले ५७ बलमा ६ चौका र ३ छक्का प्रहार गर्दा उत्तमले ४४ बलमा ३ चौका र २ छक्का प्रहार गरे।

ओपनर आकाश त्रिपाठीले २६ रन, अर्जुन कुमालले २७ र नरेन भट्टले १४ रन बनाए। दिलसाद अलि ३ रनमा आउट भए।

बलिङमा कर्नाटकका लागि ध्रुव वासु र लोहित एसले २/२ विकेट लिए। अब नेपाल र कर्नाटकबीच मंसिर ४ र मंसिर ६ मा बाँकी खेल हुनेछन्।

नेपालले एसिया कपको तयारीका लागि कर्नाटकसँग पाँच खेलको एक दिवसीय सिरिज खेलेको हो।

यू-१९ एसिया कप मंसिर १४ देखि युएईमा सुरु हुँदैछ। एसिया कपमा नेपालले समूह ‘बी’ मा अफगानिस्तान, बंगलादेश र  श्रीलंकासँग प्रतिस्पर्धा गर्नेछ।

नेपालले आफ्नो पहिलो खेल मंसिर १४ मा श्रीलंकासँग खेल्ने कार्यक्रम छ। एसिया कपको समूह ‘ए’ मा भारत, पाकिस्तान, युएई र जापान छन्।

नेपाली टोलीको प्रशिक्षकमा शक्ति गौचन छन्। नेपाली टोलीमा कप्तान हेमन्त धामीसँगै अर्जुन कुमाल, आकाश त्रिपाठी, उत्तम रंगु थापामगर, मयन यादव, नरेन साउद, युनिसविक्रम सिंह ठकुरी, नरेन भट्ट, सन्तोष यादव, युवराज खत्री, रोशन विश्वकर्मा, विपिनकुमार महतो, राजेश यादव, दयानन्द मण्डल, अपराजित पौडेल, अभिषेक तिवारी,दिलसाद अलि र रञ्जित कुमार छन्।

एसिया कपमा नेपालले मंसिर १४ मा श्रीलंकासँग खेलेपछि दोस्रो खेल मंसिर १६ मा बांङ्लादेशसँग र तेस्रो खेल मंसिर १८ मा अफगानिस्तानसँग खेल्नेछ। समूहको शीर्ष दुई टोलीले सेमिफाइनलमा स्थान बनाउनेछन्। सेमिफाइनल खेल मंसिर २१ र फाइनल २३ गते हुनेछ।