सिन्धुपाल्चोक- सिन्धुपाल्चोकको बाह्रबिसे नगरपालिकामा चार सय किलोभोल्ट केभीको सबस्टेसन निर्माण काम तीव्र गतिमा भइरहेको छ । तामाकोशी, सुनकोशी नदी र ती नदीका सहायक खोलानालामा निर्माण हुने जलविद्युत् आयोजनाहरूको विद्युत् राष्ट्रिय प्रसारण प्रणालीमा प्रवाह गर्न र देशभित्रको प्रणालीलाई सदृढ बनाउन चार सय केभी बाह्रबिसे सबस्टेसन निर्माण तीव्र गतिमा भइरहेको हो ।

सोही स्थानमा दुई सय २० र एक सय ३२ केभी र एक सय ३२ र ११ केभी सबस्टेसन निर्माण सम्पन्न गरी उपकरणहरूको परीक्षण सम्पन्न भइसकेको छ । ग्यास इन्सुलेटेड प्रणाली जिआइएस प्रविधिमा आधारित चार सय केभी बाह्रबिसे सबस्टेसनका सम्पूर्ण उपकरण निर्माणस्थलमा आपूर्ति भइसकेका छन् । पावर ट्रान्सफर्मर राख्ने सिभिल संरचनाको निर्माण सम्पन्न गरी जडान भइरहेको छ ।

नियन्त्रण कक्ष, जिआइएसका उपकरण रहने भवनको सिभिल संरचना निर्माणाधीन छन् । सिभिल संरचनाहरूको निर्माण सम्पन्न भएपछि उपकरणको जडान सुरु हुनेछ । सबस्टेसनको समग्र निर्माण प्रगति ७० प्रतिशतको हाराहारीमा छ । सबस्टेसन निर्माण आगामी जेठभित्र सम्पन्न गर्ने गरी काम धमाधम भइरहेको छ ।

नेपाल विद्युत् प्राधिकरणका कार्यकारी निर्देशक कुलमान घिसिङले शनिबार सबस्टेसन निर्माणस्थलको अनुगमन गरी तोकिएको समयभन्दा अघि नै सम्पूर्ण काम सम्पन्न गर्न आयोजना व्यवस्थापन र निर्माण व्यवसायीलाई आग्रह गरे ।

चार सय केभी बाह्रबिसे सबस्टेसन निर्माण सम्पन्न भएपछि बलेफी तथा भोटेकोशी नदी करिडोरमा निर्माण भएका जलविद्युत् आयोजनाको विद्युत् यही सबस्टेसनमा जोडी बाह्रबिसे–खिम्ती चार सय केभी प्रसारणलाइनमार्फत ढल्केबरतर्फ पठाउन सकिने उनले बताए । उक्त सबस्टेसनलाई उच्च प्राथमिकता राखेको उनको भनाइ थियो ।

खिम्ती, बाह्रबिसे र लप्सीफेदी चार सय केभी सबस्टेसन आयोजनाअन्तर्गत तीन सबस्टेसन निर्माणाधीन छन् । तामाकोशी–काठमाडौं दुई सय २० चार सय केभी प्रसारणलाइन आयोजनाअन्तर्गत रामेछापस्थित नयाँ खिम्ती सबस्टेसनबाट बाह्रबिसेसम्म ४३ किलोमिटर प्रसारणलाइन निर्माण अन्तिम चरणमा छ ।

यसअघि भदौ १२ मा ऊर्जा, जलस्रोत तथा सिँचाइमन्त्री दीपक खड्काले सिन्धुपाल्चोकको बाह्रबिसेस्थित पलाँतीमा निर्माणाधीन मध्यभोटेकोशी जलविद्युत् आयोजनाको पावरहाउस तथा सबस्टेसनको निरीक्षण गरी उक्त आयोजना तथा सबस्टेसनको काम चाँडो सम्पन्न गर्न निर्देशन दिएको थियो ।

खिम्ती–बाह्रबिसे प्रसारणलाइनमा पर्ने ११८ टावरमध्ये ११७ वटाको जग हालिएको छ । ११५ वटा टावर खडा गरिएको छ । करिब ३६ किलोमिटर तार तानिएको छ । बाँकी एक टावर निर्माणाधीन छ । खिम्ती–बाह्रबिसे खण्ड आगामी माघभित्र सञ्चालनमा ल्याउने गरी काम भइरहेको छ ।

त्यस्तै, बाह्रबिसेबाट काठमाडौंको लप्सीफेदीसम्मको ४६ किलोमिटर चार सय केभी डबल सर्किट प्रसारणलाइन पनि निर्माणाधीन छ । सो ४६ किलोमिटर प्रसारणलाइनमा पर्ने १२२ टावरमध्ये ११८ वटाको जग हालिएको छ । ११७ वटा टावर खडा गरिएको छ । करिब ४२ किलोमिटर तार तानिएको छ । बाँकी टावरको काम भइरहेको छ ।

खिम्ती–बाह्रबिसे–काठमाडौं हुँदै प्रवाह भएको विद्युतलाई काठमाडौं उपत्यकामा लैजानका लागि लप्सीफेदी–चाँगुनारायण १३२ केभी प्रसारणलाइन अगाडि बढाइएको छ । स्थानीयको अवरोधका कारण निर्माण प्रभावित छ ।

अमेरिकी सहायता परियोजना मिलेनियम च्यालेन्ज कर्पोरेसन एमसिसीले निर्माण गर्ने चार सय केभीको प्रसारणलाइन निर्माण सम्पन्न भएपछि लप्सीफेदीबाट विद्युतलाई नवलपरासीको  बर्दघाट सुस्ता पश्चिम भूमहीस्थित नयाँ बुटवल सबस्टेसनतर्फ प्रवाह गराउन सकिनेछ ।