काठमाडौँ । काठमाडौँ महानगरपालिकाले महानगर प्रहरी बलका ८३ जना नगर प्रहरी जवानलाई आधारभूत तालिम प्रदान गरिएको छ ।

महानगरले कार्तिक ६ गते सुरु भएको तालिम मंसिर १७ गते हिजो सकिएको हो ।

तालिम समापन अवसरमा महानगरपालिकाका प्रमुख प्रशासकीय अधिकृत सरोज गुरागाईँले प्रहरी जवानला प्रमाण पत्र प्रदान गरेका थिए । यो दोस्रो चरणको तालिम हो । भदौ ४ गतेदेखि पहिलो चरणको तालिम सुरु गरिएको थियो । असोज १० गते सकिएको यो चरणको तालिममा ११० जना जवानलाई सहभागी गराइएको थियो ।

यसरी २ चरमा १९३ जना जवानलाई आधारभूत तालिम प्रदान गरिएको छ । नगर प्रहरीलाई कर्तव्यनिष्ठ, अनुशासित, साहसिक, फौजी सिप एवं कौशलले भरिएको व्यावसायिक बनाउन, महानगरपालिका र महानगरबासीप्रति समर्पित रहेर सेवा भावबाट काम गर्ने क्षमताका लागि तालिम प्रदान गरिएको हो ।

यसैगरी उक्त तालिममा शारीरिक तन्दुरुस्ती, कवाज, विशिष्ठ पदाधिकारी र उनीहरु सम्बद्ध कार्यक्रम व्यवस्थापन, पब्लिक अर्डर म्यानेजमेन्ट, म्याप रिडिङ्, पुलिस प्याकेज, अनआर्म कम्व्याट, आपतकालीन उद्धार, ट्राफिक व्यवस्थापन, मानव अधिकारलगायत विषयमा कक्षा सञ्चालन गरिएको थियो ।

प्रमाण पत्र वितरण गर्दै महानगरपालिकाका प्रमुख प्रशासकीय अधिकृत सरोज गुरागाइँले, नगर प्रहरीको पेशागत दक्षता र सांगठनिक नेतृत्व वृद्धि भएको तथा पदीय दायित्व निर्वाह गर्न क्षमता विकास भएको अपेक्षा व्यक्त गरे । महानगर प्रहरीलाई प्रदान गरिएको तालिमबाट सुरक्षा संयन्त्रका विच सहकार्यको संस्कार सुरु भएको, तालिम केन्द्रका प्रमुख शसस्त्र प्रहरी वरिष्ठ उपरीक्षक राजेन्द्र खड्का भनाइ छ ।