काठमाडौं। अनिवार्य अवकाशमा जान लागेका चार जना सशस्त्र प्रहरी बलका डिआइजीहरूको पदावधि एक वर्ष थप गरिएको छ। मंगलबार (आज) बालुवाटारमा बसेको मन्त्रिपरिषद्को बैठकले १२ बजेबाट पदावधि सकिन लागेका डिआइजीहरू कमल गिरी, गणेश ठाडा मगर, कुलबहादुर नेम्बाङ र शम्भु सुवेदीको कार्यकाल थप्ने निर्णय गरेको हो।

मन्त्रिपरिषद्को निर्णयबारे जानकारी दिँदै एक मन्त्रीले बताएअनुसार निर्णय गृह मन्त्रालयमा पुगिसकेको छ। सोही अनुसार, गृह मन्त्रालयले पदावधि थपसम्बन्धी पत्र तयार गर्ने प्रक्रिया अघि बढाइसकेको छ।

सशस्त्र प्रहरी नियमावलीअनुसार, सरकारले आवश्यकता ठानेमा आइजिपीको सिफारिसमा एक वर्ष पदावधि थप गर्न सक्ने व्यवस्था छ। पदावधि थपसँगै डिआइजीहरूका लागि एआइजीपी र उस्तै परे आइजिपीसम्म पुग्ने अवसरको ढोका खुल्ने अधिकारिहरूले बताएका छन्।