काठमाडौं । त्रिचन्द्र बहुमुखी क्याम्पस , अमृत साइन्स क्याम्पस र रत्नराज्य क्याम्पसमा आज सम्पन्न हुने भनिएको स्ववियू निर्वाचन स्थगित भएको छ । निर्वाचनको सम्पूर्ण तयारी पूरा भएर पनि क्याम्पस प्रवेश गर्ने मुख्यद्वारमै तालाबन्दी भएका कारण निर्वाचनको माहोल नभएको निर्वाचन अधिकृत डा। अंगदमणि गौतमले बताए । प्रतिकूल परिस्थितिमा सबै उम्मेदवार प्रतिनिधिहरूसँगको छलफलपछि निर्वाचन स्थगित गरिएको उनले बताए ।

उता अमृतमा पनि तालाबन्दी कै कारण चुनाव स्थगित भएको हो । क्याम्पस हाताभित्र होहल्ला र झडपको अवस्था सिर्जना भएकाले सुरक्षा चुनौती मध्यनजर गर्दै चुनाव स्थगित गर्नुपरेको नि।क्याम्पस प्रमुख डा होम बहादुर बानियाँले बताए । भोलि सबै संगठनहरुको छलफल राखिएको र सहमति अनुसार निर्वाचनका बाँकी प्रक्रिया अगाडि बढाइने उनले बताए । उनका अनुसार आजबाट नियमित रुपमा पठनपाठन भने सुरु भएको छ ।
यसैगरी रत्नराज्य क्याम्पसमा स्वतन्त्र विद्यार्थी युनियन (स्ववियू) चुनावको अघिल्लो दिन तालाबन्दी गरिएको छ । नेकपा एमाले निकट अनेरास्ववियु र नेकपा एस निकट अनेरास्ववियूको गठबन्धनले तालाबन्दी गरेको हो । नेपाल विद्यार्थी संघले आरआर जस्तो लालकिल्ला ठानिएको क्याम्पसमा चुनाव हार्ने डरले मध्यरातमा तालाबन्दी गरिएको आरोप लगाएको छ ।