चालु आर्थिक वर्ष २०८०/८१ को आठ महिनामा वीरगञ्ज सुक्खा बन्दरगाह भन्सार कार्यालयले कुल ३२ अर्ब ३२ करोड ८८ लाख ७८ हजार रुपैयाँ राजस्व सङ्कलन गरेको छ। भन्सार विभागले यस कार्यालयलाई वार्षिक रूपमा ६० अर्ब चार करोड ८७ लाख ९७ हजार रुपैयाँ राजस्व सङ्कलन गर्ने लक्ष्य दिएको थियो।

कार्यालयका प्रमुख धनबहादुर बरुवालका अनुसार पछिल्ला दुई महिनामा राजस्व सङ्कलन दरमा उल्लेख्य सुधार देखिएको छ। माघ र फागुन महिनामा क्रमशः चार अर्ब २९ करोड र चार अर्ब ६८ करोड रुपैयाँ राजस्व संकलन भएको छ, जुन मासिक लक्ष्यको ९२ प्रतिशत बराबर रहेको बताइएको छ।

यसअघि साउनमा तीन अर्ब ७५ करोड, भदौमा चार अर्ब ६४ करोड, असोजमा चार अर्ब ३६ करोड, कात्तिकमा तीन अर्ब ७९ करोड, मङ्सिरमा तीन अर्ब २२ करोड, पुसमा तीन अर्ब ५६ करोड रुपैयाँ राजस्व सङ्कलन भएको थियो।

हालसम्मको राजस्व सङ्कलन वार्षिक लक्ष्यको ५४ प्रतिशतभन्दा थोरै बढी मात्र पुगेको छ। तथापि, माघ र फागुन महिनामा प्राप्त उत्साहजनक संकलन दरले बाँकी अवधिमा लक्ष्य पुरा गर्न सहज हुने संकेत देखिएको छ। वीरगञ्ज सुक्खा बन्दरगाहबाट हुने आयात निर्यात कारोबार नेपालको एक मुख्य व्यापारिक नाका भएकाले यस भन्सार कार्यालयको प्रदर्शनले समग्र राजस्व प्रणालीमा प्रभाव पार्ने विज्ञहरू बताउँछन्।

भन्सार प्रमुख बरुवालका अनुसार अहिले भारत, चीन लगायत तेस्रो मुलुकबाट आयात भएका वस्तुहरूको ढुवानी र निकासी सहज भइरहेको छ। सुक्खा बन्दरगाहमा भौतिक संरचना विस्तार र डिजिटल प्रणाली प्रभावकारी बनेमा राजस्व संकलनमा अझ वृद्धि हुने अपेक्षा गरिएको छ।