काठमाडौं– सभामुख देवराज घिमिरेलाई भेटेर रास्वपा सभापति रवि लामिछानेले सांसद पद निलम्बन फुकुवाका लागि आग्रह गरेका छन्।

रास्वपाका सांसदसहित सभामुख भेट्नका लागि पुगेका लामिछानेले भने,‘निलम्बन फुकुवा गरियोस्। ममाथि अन्याय भएको छ।’

यसअघि गत माघ १८ गते पनि सभामुखलाई भेटेर सभापति लामिछानेले आफ्नो सांसद पद निलम्बन फुकुवा गरिदिन आग्रह गरेका थिए।

मंगलबार पुनः सभामुखलाई भेटेर लामिछानेले आफ्नो सांसद पद निलम्बन फुकुवा गरिदिन आग्रह गरेका हुन्। लामिछाने सांसद पदबाट गत पुस ८ गते निलम्बनमा परेका थिए।

गत कात्तिक २ गते सभापति लामिछाने पक्राउ परेका थिए। पछि सहकारी ठगी, संगठित अपराध र सम्पत्ति शुद्धीकरण अभियोगमा मुद्दा दर्ता भएपछि गत पुस ८ गते उनको सांसद पद निलम्बन भएको थियो।

लामिछानेविरुद्ध सहकारी ठगी, संगठित अपराधसहित सम्पत्ति शुद्धीकरणमा कास्की जिल्ला अदालतमा अभियोगपत्र दर्ता भएपछि कास्की जिल्ला प्रहरीले संघीय संसद सचिवालयमा जानकारी पत्र पठाएको थियो।