नवलपरासी  – पूर्वपश्चिम राजमार्गअन्तर्गत नारायणघाट–बुटवल खण्डको विनयी त्रिवेणी गाउँपालिकास्थित विनयी खोलामा आएको बाढीले यात्रुवाहक बस बगाउँदा एक्साभेटरको सहयोगमा ३८ यात्रुको उद्धार गरिएको छ। काठमाडौँबाट नेपालगञ्जतर्फ जाँदै गरेको भे.१.ख ४०८५ नम्बरको बसलाई मध्यराति १२:१० बजे बाढीले बगाएको थियो।

बाढीमा फसेका तीन शिशुसहित ३८ यात्रुलाई स्थानीय प्रशासन र प्रहरीको सहयोगमा एक्साभेटर प्रयोग गरी सुरक्षित उद्धार गरिएको हो। उद्धार गरिएका यात्रुहरू सबै सकुशल रहेको र उनीहरूलाई सुरक्षित स्थानमा स्थानान्तरण गरिएको स्थानीय प्रहरीले जनाएको छ।

विनयी खोलामा अविरल वर्षातका कारण आएको बाढीले राजमार्ग अवरुद्ध भएको छ। बाढीले सडकमा क्षति पुग्दा सवारी आवागमनमा समेत समस्या भएको छ। स्थानीय प्रशासनले बाढी प्रभावित क्षेत्रमा उद्धार र राहत कार्यलाई तीव्रता दिएको छ।

मौसम विभागले अझै केही दिन वर्षा जारी रहने पूर्वानुमान गरेको छ। यस्तो अवस्थामा सतर्कता अपनाउन र जोखिम क्षेत्रमा यात्रा नगर्न प्रहरीले सर्वसाधारणलाई आग्रह गरेको छ। विनयी त्रिवेणी गाउँपालिकाले बाढीले पुर्‍याएको क्षतिको मूल्याङ्कन र दीर्घकालीन समाधानका लागि सम्बन्धित निकायसँग समन्वय गरिरहेको जनाएको छ।