काठमाडौं, नेपाली कांग्रेसको कार्यसम्पादन समितिको बैठकले पार्टीभित्रको महाधिवेशन मितिसम्बन्धी चर्को विवाद समाधान गर्न कार्यवाहक सभापति पूर्णबहादुर खड्कालाई पूर्ण जिम्मेवारी दिएको छ। ललितपुरको धोबीघाटमा आज बसेको बैठकले पदाधिकारी र शीर्ष नेताहरूसँग समन्वय गरी निकास निकाल्ने जिम्मा खड्कालाई सुम्पिएको हो।

सहमहामन्त्री किशोरसिंह राठौरले बैठकपछि सञ्चारकर्मीलाई जानकारी दिँदै भने, “पूर्णदाईलाई मुख्य जिम्मेवारी दिएका छौँ। उहाँसहित उपसभापति धनराज गुरुङ, महामन्त्री गगन थापा र विश्वप्रकाश शर्माले सहयोग गर्नुहुनेछ। पदाधिकारीबाहिरका नेताहरूसँग पनि छलफल गरेर निकास निकालिनेछ।”

बैठकले खड्कालाई शेखर कोइराला, कृष्णप्रसाद सिटौला, विमलेन्द्र निधिलगायत शीर्ष नेताहरूसँग परामर्श गर्न निर्देशन दिएको छ। कांग्रेसमा महाधिवेशन निर्वाचनअघि विशेष अधिवेशन गर्ने वा पछि नियमित वैशाखमा गर्ने भन्नेमा गम्भीर मतभेद छ।

महामन्त्रीद्वय थापा र शर्माले नियमित नभए मङ्सिर वा पुसमा विशेष महाधिवेशनको कार्यतालिका ल्याउनुपर्ने अडान लिएका छन्। तर, संस्थापन पक्ष वैशाख मात्रै महाधिवेशन गर्ने पक्षमा अडिग छ। सहमति नजुटे भोलि दिउँसो २ बजेका लागि बोलाइएको केन्द्रीय समिति बैठक सर्ने सम्भावना बढेको छ।

उपचारका लागि सिङ्गापुर गएका सभापति शेरबहादुर देउवा आज साँझ स्वदेश फर्किँदै छन्। शीर्ष नेताहरूले देउवासँग परामर्श लिएर विवाद टुङ्ग्याउने प्रयास थाल्ने बताएका छन्।

कांग्रेसको यो आन्तरिक द्वन्द्वले पार्टी एकतामा चुनौती थपेको विश्लेषकहरूले बताएका छन्।