सुर्खेत । १६ वर्षीया किशोरी इनिशा विकको बलात्कारपछि हत्या भएको आरोपमा सुर्खेतको वीरेन्द्रनगरमा पीडित परिवार र स्थानीयबासीले निष्पक्ष छानबिनको माग गर्दै बुधबार खबरदारी र्‍याली निकालेका छन् । जनजागरण सामुदायिक वन क्षेत्रमा मृत फेला परेकी इनिशाको घटनालाई लिएर प्रदर्शनकारीहरूले राज्यको गम्भीरता र दोषीमाथि कडा कारबाहीको माग गरेका छन् ।

फागुन २३ गते ट्युसन पढ्न घरबाट निस्केकी गुर्भाकोट नगरपालिका–६ बडाखोली स्थायी घर भई हाल वीरेन्द्रनगर–१ मा बस्दै आएकी इनिशा विकलाई केही घण्टामै वीरेन्द्रनगर–४ स्थित जनजागरण सामुदायिक वन (शहीद पार्क नजिक) मा बेहोस अवस्थामा फेला पारिएको थियो । पछि उनको मृत्यु भएको पुष्टि भएको छ । पोस्टमार्टम रिपोर्ट र प्रारम्भिक अनुसन्धानले बलात्कारपछि हत्या भएको संकेत गरेको छ । प्रहरीले घटनामा संलग्न भएको आरोपमा चार जना युवकहरूलाई पक्राउ गरेको छ । उनीहरूको नाम अनमोल गौली (१८ वर्ष), दीपेश ढकाल, आशिक ढकाल र गौरव ढकाल रहेको विभिन्न स्रोतले जनाएका छन् । परिवार र स्थानीयका अनुसार उनीहरूलाई लोभलालचमा पारेर जंगलमा लगी सामूहिक बलात्कारपछि हत्या गरिएको आरोप छ । केही स्रोतमा अपराधीहरूले उमेर घटाएर नाबालक देखाउने प्रयास गरेको भन्दै आक्रोश व्यक्त गरिएको छ ।

बुधबार पीडित परिवार, आफन्त, स्थानीयबासी र अधिकारकर्मीहरूले वीरेन्द्रनगरमा र्‍याली निकालेका थिए । प्रदर्शनकारीहरूले ‘बालिकामाथि हुने बलात्कार, हत्या र हिंसा बन्द गर’, ‘इनिशालाई न्याय देऊ’, ‘हत्यारालाई कडा कारबाही गर’ जस्ता नारा लगाएका थिए । उनीहरूले घटनाको सत्यतथ्य छिटो सार्वजनिक गर्न, निष्पक्ष, पारदर्शी र द्रुत छानबिन गर्न तथा पीडित परिवारलाई न्याय दिलाउन राज्यलाई दबाब दिएका छन् ।

‘सत्यतथ्य सार्वजनिक नभएसम्म आन्दोलन जारी राख्छौं,’ पीडित परिवारका सदस्यहरूले चेतावनी दिएका छन् । उनीहरूले महिलामाथि हुने यस्ता जघन्य अपराधमा राज्यले कडा कदम चाल्नुपर्ने माग गरेका छन् । जिल्ला प्रहरी कार्यालय सुर्खेतले अनुसन्धान जारी रहेको र केही व्यक्तिलाई नियन्त्रणमा लिएर सोधपुछ भइरहेको जनाएको छ । घटनाले सुर्खेतमा महिलामाथि हुने हिंसा र बालिका सुरक्षा विषयलाई पुनः बहसमा ल्याएको छ । पीडित परिवारले दोषीहरूलाई कानुनअनुसार हदैसम्मको सजायको माग गरेका छन् ।