एजेन्सी । लेबनानले मार्च २ देखि इजरायली आक्रमणमा परी मृत्यु हुनेको संख्या १,०२९ पुगेको बताएको छ । लेबनानको जनस्वास्थ्य मन्त्रालयले आइतबार बताएअनुसार मार्च २ देखि देशमा इजरायली आक्रमणमा मृत्यु हुनेको संख्या १,०२९ पुगेको छ भने २,७८६ जना घाइते भएका छन् ।

आइतबारको आक्रमणमा लेबनानमा पाँच जनाको मृत्यु भएको छ भने ४६ जना घाइते भएका छन् । यसैबीच, देशभरि आक्रमणहरू बढ्दै गएका छन् । इजरायली लडाकु विमानहरूले आइतबार दक्षिणी लेबनानको लिटानी नदीमा रहेको कास्मिया पुलमा प्रहार गरेको लेबनानको राष्ट्रिय समाचार एजेन्सीले जनाएको छ ।

इजरायली सेनाले आक्रमणको पुष्टि गर्दै भनेको छ कि उनीहरूले हिज्बुल्लाहका स्थानहरूलाई लक्षित गरेका थिए । यसअघि इजरायली प्रधानमन्त्री बेन्जामिन नेतान्याहू र रक्षामन्त्री इजरायल काट्जले सेनालाई हिज्बुल्लाह समूहले प्रयोग गर्ने लिटानी नदीमाथिका सबै पुलहरू तुरुन्तै ध्वस्त पार्न आदेश दिएका थिए ।

हिज्बुल्लाहले आइतबार राति शृंखलाबद्ध बयान जारी गर्दै धेरै इजरायली सैन्य लक्ष्यहरूमा रकेट र ड्रोन आक्रमण गरेको र दक्षिणी लेबनानमा इजरायली ड्रोन खसालेको बताएको छ । यसका साथै, इजरायली सेनाले हालै एक हिज्बुल्लाह कमाण्डरलाई मारेको दाबी गरेको छ ।

तर लेबनानी राष्ट्रपति जोसेफ आउनले आइतबार दक्षिणी लेबनानमा पूर्वाधार र महत्त्वपूर्ण सुविधाहरू, विशेष गरी लिटानी नदीमाथिको पुल र अन्य पुलहरूलाई लक्षित गरी इजरायलले गरेको विनाशको निन्दा गरे ।