काठमाडौँ ।
राष्ट्रिय स्वतन्त्र पार्टी (रास्वपा) का सभापति रवि लामिछाने अचानक भारतको उत्तराखण्डस्थित प्रसिद्ध धार्मिक स्थल कैंची धाम र आसामको कामाख्या मन्दिरको दर्शन यात्रामा निस्किएका छन्। पत्नी निकिता पौडेलसहित शुक्रबार पश्चिमी सीमा गड्डाचौकी हुँदै भारत प्रस्थान गरेका लामिछानेको यो भ्रमणलाई लिएर राजनीतिक वृत्तमा विभिन्न अड्कलबाजी सुरु भए पनि उनले भने यसलाई विशुद्ध ‘पारिवारिक तथा धार्मिक यात्रा’ बताएका छन्।
धनगढी विमानस्थलमा पत्रकारहरूसँग कुराकानी गर्दै सभापति लामिछानेले भने, “पहिलादेखि नै जाने इच्छा र भाकल थियो। मेरो परिवार पनि आध्यात्मिक प्रवृत्तिको भएकाले विगतमा आफू कारागारमा रहँदा गरेको भाकल पूरा गर्न यो यात्रामा निस्किएको हुँ। यसलाई राजनीतिसँग जोडेर नहेरियोस्।”
के हो कैंची धाम ?
उत्तराखण्डको नैनीताल नजिकै कुमाउँको हरियाली पहाडमा अवस्थित कैंची धाम भारतका प्रसिद्ध सन्त नीम करोली बाबाको तपोभूमि हो। भगवान् हनुमानका अनन्य भक्त मानिने बाबाको वास्तविक नाम लक्ष्मण नारायण शर्मा थियो। उनले सन् १९६२ तिर यहाँ आश्रम निर्माणको थालनी गरी सन् १९६४ मा हनुमानजीको मन्दिर प्रतिष्ठापन गरेका थिए।
पहाडी सडकका दुईवटा तीखा घुम्तीहरू कैंचीका दुईवटा पाता जस्तै आपसमा क्रस हुने अनौठो भौगोलिक बनोट भएकाले यस ठाउँको नाम ‘कैंची धाम’ रहन गएको बताइन्छ। सन् १९७३ मा बाबाले देहत्याग गरे पनि विश्वभरका लाखौँ श्रद्धालुहरू मानसिक शान्ति, आध्यात्मिक ऊर्जा र जीवनका कठिनाइ सामना गर्ने आत्मबल प्राप्त गर्न यहाँ पुग्ने गर्छन्।
स्टिभ जब्सदेखि मार्क जुकरबर्गसम्मको आकर्षण
कैंची धाम केवल स्थानीय श्रद्धालुहरूमा मात्र सीमित छैन, यसले विश्वप्रसिद्ध प्रविधि हस्तीहरूको ध्यान समेत तानेको छ।
- स्टिभ जब्स: एप्पलका सहसंस्थापक स्टिभ जब्स सन् १९७४ मा आध्यात्मिक मार्गदर्शन र शान्तिको खोजीमा भारत आउँदा कैंची धाम पुगेका थिए। यद्यपि उनी पुग्नुभन्दा केही समयअघि नै बाबाको निधन भइसकेको थियो।
- मार्क जुकरबर्ग: जब्सकै सल्लाहमा फेसबुकका संस्थापक मार्क जुकरबर्ग सन् २००८ मा फेसबुकको सुरुवाती कठिन समयमा आफ्नो उद्देश्य र दृष्टिकोण स्पष्ट गर्न कैंची धाम आएका थिए। पछि सन् २०१५ मा भारतीय प्रधानमन्त्री नरेन्द्र मोदीसँगको संवादका क्रममा जुकरबर्गले उक्त भ्रमणले कम्पनीको उद्देश्यप्रतिको विश्वास थप बलियो बनाएको स्मरण गरेका थिए।
कामाख्या मन्दिरको पनि दर्शन गर्ने
उत्तराखण्डको कैंची धाममा पूजाअर्चना र ध्यान सकेपछि लामिछाने दम्पती आसामको गुवाहाटीस्थित प्रसिद्ध शक्तिपीठ कामाख्या देवी मन्दिर प्रस्थान गर्ने कार्यक्रम रहेको छ। नीलाचल पहाडमा अवस्थित कामाख्या मन्दिर हिन्दू धर्मको शाक्त तथा तान्त्रिक परम्परामा अत्यन्त शक्तिशाली र पवित्र तीर्थ मानिन्छ।
लामिछानेको यो अचानक भएको आध्यात्मिक यात्राले सर्वसाधारण र राजनीतिक वृत्त दुवैतिर निकै चासो र चर्चा बटुलेको छ।
प्रतिक्रिया