Logo

बस्ती डुबानमा परेको भन्दै स्थानीयवासीले भत्काए नहर


कावासोती : नवलपरासीको भारतीय नहर सुस्ता स्थानीयवासीले भत्काइदिएका छन् । गण्डक सम्झौताबाट बनेको भारतीय नहर सुस्ताको कारण बस्ती डुवानमा परेको भन्दै स्थानीयवासीले भत्काइदिएका हुन् । नहरका कारण नवलपरासीको सुस्ता गाँउपालिकाको १ र २ नम्बर वडाका बस्ती डुवानमा परेको थियो ।

करिब दुई सयको संख्यामा रहेका उनीहरूले भारतीय नहरका कारण आफ्नो घर र खेतबारी डुबानमा परेको भन्दै फलामे पुल नजिकै खनेर भत्काएका हुन् । नहर भत्काउँदै गर्दा उनीहरूलाई प्रहरीले रोकेको थियो ।

अविरल वर्षाका कारण नवलपरासीको सुस्ता गाउँपालिका वडा नम्बर १ र २ डुबानमा परेका छन् । पानीले घरबास उठिबास हुन लागेको र एक हजार बिगाहा भन्दा बढी धानबाली नष्ट गर्न थालेपछि पानीको निकास निकाल्न भारतीय पश्चिमी नहर फुटाल्न गएको स्थानीयवासीले बताए ।

पानीको निकास नहुँदा सुस्ता गाउँपालिकाको वडा नम्बर १ का बरुवा, छिबनी, फेचुहा र रुपौलिया तथा वडा नम्बर २ का सत्तपति र महलबारीमा एक हजार बिगाहाभन्दा बढी जमिनमा लगाइएको धानबाली र नगदेबाली उखु नष्ट भएको छ ।

आफूहरूले लगाएको खेतीबाली वर्षेनी यसरी नै डुबानमा पर्ने गरेको स्थानीयवासी सुवेदीले बताए । डुबानबाट बच्न भारतीय नहरमा निकास बनाउनु उनले बताए । पटकपटक प्रशासनलाई भन्दा पनि कुनै सुनुवाई नभएको स्थानीयवासीको गुनासो छ ।

भारतीय पश्चिमी नहरमा पानीको निकासका लागि साइफन वा स्वचालित फाटक बनाउनुपर्ने सुस्ता गाउँपालिकाका अध्यक्ष रामप्रसाद पाण्डेले बताए ।

प्रतिक्रिया दिनुहोस्