खाने हाेइन त बाख्राकाे दूधकाे चिज ?

खाने हाेइन त बाख्राकाे दूधकाे चिज ?

विकास टाइम्स
42
Shares

स्याङजा ।

स्याङ्जाको भीरकोट–८ ओकादीका डिलबहादुर गुरुङले बाख्राको दूधबाट चिज उत्पादन थालेका छन् । १० वर्षअघि ‘जुना बाख्रापालन फार्म’ दर्ता गरी सानन जातका बाख्रा पाल्न थालेका उनले २ सातादेखि चिज उत्पादन सुरु गरेका हुन् ।

गुरुङले दैनिक ५ लिटर दूधबाट चिज बनाउँदै आएका छन् । उनको फार्ममा २७ माउ तथा २३ पाठापाठी गरी हाल ५० बाख्रा छन् । २७ माउमध्ये अहिले १० वटाले दूध दिन्छन् ।

भैंसी तथा गाईको दूधबाट चिज बनाइरहेका बेला गुरुङले स्याङ्जामा नै पहिलो पटक बाख्राको दूधबाट चिज उत्पादन थालेका हुन् । स्थानीय खरीको माउ र विदेशी सानन जातको बोकाबीच क्रस गराइएको छ । दूध उत्पादन गर्ने, उत्पादित दूधबाट चिज र साबुन बनाउने उनको लक्ष्य छ ।

‘ठुला होटलमा बाख्राको दूधबाट बनेको चिजको माग बढी हुने भएकाले उत्पादन थालेको हुँ’, उनले भने, ‘भर्खरै उत्पादन थालेको छु, अहिले उत्पादन भएको बिक्री भइरहेको छ, उत्पादन वृद्धि गरे बजारको खोजी गर्नुपर्ने हुन्छ ।’

बाख्राको दूधबाट चिज बनाउनेसम्बन्धी सीप गुरुङले तनहुँको बन्दीपुरमा सिकेका हुन् । २ वर्षअघि चिज बनाउने सीप सिकेपछि घरमै प्रयोगात्मक परीक्षण गरेर व्यावसायिक उत्पादन थालेको उनी बताउँछन् । ‘अहिले उत्पादन भएको चिज स्थानीय स्तरमै प्रतिकिलो २ हजारका दरले बिक्री भइरहेको छ’, गुरुङले भने, ‘अब यसलाई गुणस्तर, प्याकेजिङ र ब्रान्डिङ गरी बजार पठाउने तयारीमा छु ।’

भारतमा रेडियो र टेलिभिजन मर्मत तथा वायरिङसम्बन्धी तालिम लिई काम गर्दै आएका गुरुङले स्वदेशमै फरक ढंगको व्यवसाय थाल्ने लक्ष्यसहित घर फर्किए ।

बाख्रापालनसम्बन्धी तालिम लिएका गुरुङ भन्छन्, ‘मासु तथा पाठापाठी खरिद बिक्री त सबैले गर्छन् । अरूले भन्दा फरक खालको व्यवसाय गर्ने हुटहुटीले दुधालु सानन जातका बाख्रापालन गर्ने निचोडमा पुगेको हुँ । अहिले राम्रै गरेछु भन्ने लागेको छ ।’

गुरुङले २०७० सालमा १२ बाख्राबाट व्यवसाय थालेका थिए । बाख्रा खरिद र खोर निर्माणमा ३ लाख ५० हजार रुपैयाँ लगानी गरी व्यवसाय थालेका गुरुङ अहिले यो व्यवसायबाट सन्तुष्ट छन् ।

नमुना बाख्रा गाउँ अभियानका अभियान्ता सुशील अर्यालले चिजको माग पछिल्लो समय बढ्दै गएकाले उत्पादनलाई गुणस्तरयुक्त बनाउनुका साथै वृद्धि गर्नुपर्ने सुझाव दिए । ‘बाख्राको दूधबाट उत्पादित चिजको बजार मूल्य राम्रो छ’, उनले भने, ‘गुणस्तरयुक्त उत्पादन गर्न सके बजारको समस्या हुँदैन ।’