बुटवल–नारायणगढ सडकको पूर्वी खण्डमा काम कछुवाको गतिमा

बुटवल–नारायणगढ सडकको पूर्वी खण्डमा काम कछुवाको गतिमा

विकास टाइम्स
6
Shares

फाइल तस्बिर

नवलपुर ।

विस्तारको काम सुरु भएको पूर्वपश्चिम राजमार्गअन्तर्गत बुटवल–नारायगढ सडकको पूर्वी खण्डमा ३५ प्रतिशत काम सकिएको छ । नवलपरासी (बर्दघाट–सुस्तापूर्व)मा पर्ने पूर्वी खण्डमा प्रतिमहिना ३ प्रतिशतभन्दा बढी प्रगति आउने गरी काम भइरहेको हो ।

नारायणगढ–बुटवल सडक योजना पूर्वी खण्डका सूचना अधिकारी इन्जिनियर धीरज ढकालका अनुसार पछिल्लो समय सडकमा कालोपत्र हुने क्रम बढेपछि समग्र प्रगति बढेको देखिएको हो ।

‘सडक विस्तार गर्ने क्रममा छेउछाउमा माटो भर्ने, रूख काट्ने, विद्युतका खम्बा सार्नेलगायत काम गर्दा भौतिक प्रगति खासै देखिँदैन,’ उनले भने, ‘अहिले धेरै ठाउँमा कालोपत्रको काम धमाधम भइरहेका कारण भौतिक प्रगति बढ्दै गएको हो ।’

इन्जिनियर ढकालका अनुसार सडकको नवलपुर खण्डमा ८.५ किलोमिटर सडकमा कालोपत्रको काम भइसकेको छ । ‘अहिले यस सडकको पूर्वी खण्डमा साढे ८ किलोमिटर एकतर्फी कालोपत्रको काम भएको छ,’ उनले भने, ‘हर्कपुर, अमरापुरी तथा कावासोतीमा कालोपत्रको काम भएको छ, धेरै ठाउँमा कालोपत्रको तयारी भइरहेको छ ।’

अहिले सडकका विभिन्न भागमा दैनिकजसाे कालोपत्रको काम भइरहेको इन्जिनियर ढकालले बताए । ‘सडक विस्तारका लागि संरचना हटाएर माटो भरिएको ठाउँमा कालोपत्रको तयारी भइरहेको छ,’ उनले भने, ‘आगामी असारसम्म मुकुन्दपुरबाट डोन्डासम्म कालोपत्र गर्ने गरी निर्माण व्यवसायीले काम गरिरहेको छ ।’

इन्जिनियर ढकालका अनुसार यस खण्डको ६५ किमी क्षेत्रमा निर्माण हुने २१५ कल्भर्टमध्ये १११ मा काम सकिएको तथा ४० स्थानमा कल्भर्ट निर्माणको काम भइरहेको छ । यहाँ साना फलामे पुललाई हटाएर निर्माण हुने २२ माइनर ब्रिज (साना पक्की पुल)मध्ये १४ स्थानमा पुल निर्माण सम्पन्न भइसकेका छन् ।

‘२ स्थानमा एक साइडको पुल निर्माण भएको छ । ५ वटा माइनर ब्रिज निर्माणको काम भइरहेको छ,’ उनले भने, ‘निर्माण भइरहेको ठाउँमा फाउन्डेसन, सबस्टक्चर र सुपस्टक्चरको काम भइरहेको छ ।’

४ लेनमा फराकिलो हुने सडकमा रहेका २ लेनका ठूला पुलको स्थानमा १२ वटा ४ लेनका पुल निर्माण हुँदै छन् । “अहिले १२ वटै ठूला पुल निर्माणको काम धमाधम भइरहेको छ”, उनले भने, “सात पुलमा सबस्टक्चरको काम सकियो, तीन वटामा सबस्टक्चरको काम हुँदैछ भने दुईमा काम भइरहेको छ ।” ठूला पुल निर्माण हुने स्थानमा राखिने ‘प्रिकास्ट’ र ‘प्रिस्ट्रेस गडर’ (पुलमा पिल्लर निर्माण गरेपछि ल्याएर लठ्ठाले तन्काएर राखिने बिम । यो बिम राखेपछि पुलमा ढलान गरिन्छ) को काम खोलाको नजिकै भइरहेको छ ।

सडक विस्तारको कामसँगै ढल निकासका लागि नाला निर्माणको काम पनि तीव्ररुपमा अघि बढेको ढकालको भनाइ छ । उनका अनुसार हालसम्म ३१ किमी नाला निर्माणको काम सकिएको छ । “अवस्था हेरेर हामीले नाला निर्माण गरेका छौँ, उनले भने, “सहज हुने ठाउँमा त्यहीँ फाउन्डेशन उठाएर नाला बनाएका छौँ, केही स्थानमा बाहिर तयार पारिएका सेट ल्याएर नाला बनाएका छौँ ।”

सडक विस्तारका लागि विद्युत् तथा खानेपानीको संरचना सार्ने काम पनि सँगसँगै भएको उनको भनाइ छ । “अहिलेसम्म विद्युतीय संरचना सार्ने काम ४५ प्रतिशत सकिएको छ, खानेपानीको संरचना सार्ने काम ७० प्रतिशत पूरा भएको छ”, उनले भने, “सडक विस्तारका लागि काटिने करिब ३६ हजार तीन सय रुखमध्ये ९९ दशमलव ९९ प्रतिशत काम सकिएको छ ।” सडक विस्तारका लागि अहिले सबै कर्मचारी गरी दैनिक एक हजार एक सयभन्दा बढी कामदार खटिइरहेका उनको भनाइ छ ।