महानगरलाई बजेट : पाेखराले सबैभन्दा धेरै २ अर्ब ७६ करोड पाउँदा अरूले कति पाए ?

महानगरलाई बजेट : पाेखराले सबैभन्दा धेरै २ अर्ब ७६ करोड पाउँदा अरूले कति पाए ?


काठमाडाैँ ।

सरकारले आगामी आर्थिक वर्ष २०८०/८१ को वार्षिक बजेट संसद्मा प्रस्तुत गरिसकेको छ । आगामी आर्थिक वर्षका लागि अन्तरसरकारी वित्तीय हस्तान्तरणअन्तर्गत संघ सरकारबाट प्रदेश र स्थानीय तहका लागि कुल ४ खर्ब ८ करोड ७० लाख रुपैयाँ विनियोजन भएको छ । जसमध्ये चालु शीर्षकमा ३ खर्ब ३६ अर्ब ६७ करोड १० लाख र पुँजीगततर्फ ६३ अर्ब ४१ करोड ६० लाख रुपैयाँ विनियोजन भएको छ ।

अन्तरसरकारी वित्तीय हस्तान्तरणअन्तर्गत प्रदेश र स्थानीय तहमा जाने रकममध्ये समानीकरण अनुदानतर्फ १ खर्ब ४६ अर्ब १ करोड ४ लाख, ससर्त अनुदानतर्फ २ खर्ब २७ अर्ब ६१ करोड ४५ लाख, विशेष अनुदानतर्फ १३ अर्ब २६ करोड ७३ लाख र समपूरक अनुदानतर्फ १३ अर्ब २६ करोड ७३ लाख विनियोजन भएको छ ।

स्थानीय तहका लागि वित्तीय हन्तान्तरणमार्फत गएको रकममध्ये महानगरपालिकाका लागि  १० अर्ब ३१ करोड ९८ लाख, उपमहानगरपालिकाका लागि १० अर्ब ४२ करोड २२ लाख, नगरपालिकाका लागि १ खर्ब ३१ अर्ब २१ करोड ४३ लाख र गाउँपालिकाका लागि १ खर्ब ४३ अर्ब ६ करोड ३९ लाख विनियोजन भएको छ ।

महानगरपालिकामा गएको संघीय अनुदानको बजेट हेर्दा सबैभन्दा धेरै पोखरा महानगरपालिकाले २ अर्ब ७६ करोड ३२ लाख र काठमाडौँ महानगरपालिकाले २ अर्ब १४ करोड ३१ लाख रुपैयाँ पाएका छन् ।

त्यसैगरी, विराटनगर महानगरपालिकाका लागि १ अर्ब १९ करोड २४ लाख, भरतपुर महानगरपालिकाका लागि १ अर्ब ७५ करोड ३ लाख, ललितपुर महानगरपालिकाका लागि १ अर्ब १३ करोड ८७ लाख र वीरगन्ज महानगरपालिकाका लागि १ अर्ब ३३ करोड २१ लाख रुपैयाँ विनियोजन भएको छ ।

यता, संघीय बजेटमा प्रदेशका लागि १ खर्ब ५ अर्ब ६ करोड ६८ लाख र स्थानीय तहका लागि २ खर्ब ९५ अर्ब २ करोड २ लाख रुपैयाँ विनियोजन भएको छ ।

वित्तीय हन्तान्तरणमार्फत् जाने रकममध्ये सबैभन्दा धेरै कर्णाली प्रदेशले १६ अर्ब २७ करोड ३९ लाख र कोसी प्रदेशले १६ अर्ब ११ करोड ७० लाख बराबर बजेट पाएका छन् ।

मधेसका लागि १३ अर्ब ४५ करोड ३५ लाख, बाग्मतीका लागि १५ अर्ब ८१ करोड २३ लाख, गण्डकीका लागि १३ अर्ब ६० करोड ४० लाख, लुम्बिनीका लागि १५ अर्ब ३८ करोड ४२ लाख र सुदूरपश्चिमका लागि १४ अर्ब ४२ करोड १९ लाख रुपैयाँ विनियोजन भएको छ ।