काठमाडाैँ ।

बाग्मती प्रदेश राजधानी हेटाैँडाबाट संघीय राजधानी काठमाडाैँ जाेड्ने छाेटाे बाटाे निर्माणमा सबैकाे चासाे छ । मुग्लिनकाे बाटाे लामाे पर्ने तथा पहिराेले बारम्बार दुःख दिइरहने भएकाले याे बाटाे कहिले बनिसक्छ भन्ने पर्खाइमा मानिस छन् ।

यसैबीच, बाग्मती सरकारका मुख्यमन्त्री शालिकराम जम्कट्टेलले हेटौँडाबाट काठमाडौँ जोड्ने हेटौँडा–कुलेखानी–फाखेल–काठमाडौँ सडकखण्ड आगामी पुस महिनाभित्र निर्माण सम्पन्न गर्ने प्रतिबद्धता जनाएका छन्।

प्रदेशको राजधानीलाई संघीय राजधानी काठमाडौँसम्म जोड्ने मार्गहरू पहिराेको उच्च जोखिम रहेको र सामान्य वर्षा हुँदासमेत पहिरो खसेर पटक–पटक सडक बन्द हुँदा समस्या हुने गरेको भन्दै उनले उक्त सडकखण्ड समयमै निर्माण सक्न चासो दिएको बताए ।

उनले उक्त सडकखण्ड निर्माणको जिम्मा लिएका निर्माण कम्पनीलाई समयमै काम सक्न निर्देशन दिइसकेको दाबी गर्दै पुस महिनापछि हेटौँडा–काठमाडौँ आवतजावतमा सहज हुने बताए।

हेटौँडाबाट काठमाडौँ जोड्ने अन्य मार्गमा पनि विशेष गरी वर्षाको समयमा पहिराेको उच्च जोखिम हुने तथा खाल्डाखुल्डी बनेर खण्डीकरण भएका कारण जोखिम बढ्दै गएकोप्रति पनि उनले चासो र चिन्ता व्यक्त गरे। मुख्यमन्त्री जम्कट्टेलले मन्त्रीहरूसँग गरिएको कार्यसम्पादन करार सम्झौताले पनि कतिपय अधुरा र अपूरा काम समयमै सम्पन्न हुनेमा आफू विश्वस्त रहेको बताए।

उनले बुधबार प्रदेशका मन्त्रीहरूसँग कार्यसम्पादन करार सम्झौता पनि गरेका छन् । कार्यसम्पादन करार सम्झौताले कामको तीव्रता बढ्ने भन्दै उनले सरकारको मुख्य चासो भनेको हेटौँडा–काठमाडौँ जोड्ने सडक निर्माण सम्पन्न गर्नु रहेको बताए।

कार्यसम्पादन सम्झौताका क्रममा मुख्यमन्त्री जम्कट्टेलले प्रदेशको राजधानी हेटौँडालाई संघीय राजधानी काठमाडौँ जोड्ने सडकखण्ड पुस महिनाभित्र निर्माण सक्ने गरी काम गर्न सम्बन्धित मन्त्रालयका मन्त्रीलाई निर्देशन दिए ।

यस्तै विगत २ वर्षदेखि कुलेखानी–सिस्नेरी सडकखण्डको पनि २ खण्डमा स्तरोन्नति भइरहेको जानकारी दिँदै उनले सडक स्तरोन्नतिको काम लगभग सम्पन्न भएको जानकारी दिए। उनले सडक फराकिलो बनाउने काम सम्पन्न भएको र अब कालोपत्र गर्न बाँकी रहेको बताए।