नेपाली मार्सल आर्ट खेलाडी एरिका गुरुङले २०औं एसिया सिनियर कराँते च्याम्पियनसिपमा रजत पदक जितेकी छिन् । आइतबार भएको फाइनल भिडन्तमा भियतनामकी नाओन थि नुयेनसँग पराजित भएपछि उनी रजतमा सीमित भएकी हुन् ।

चीनको हाङ्जाउमा च्याम्पियनसिपको ६८ केजीमाथि तौल समूहमा एरिकाले प्रतिस्पर्धा गरेकी थिइन् । उनलाई फाइनलमा भियतनामकी नुयेनले ६–० ले पराजित गरिन् । एसियन सिनियर च्याम्पियनसिपमा नेपालले पहिलोपटक कुनै पदक जितेको हो ।

एरिकाले प्रि क्वार्टरफाइनलमा फिलिपिन्सकी इसाबेल अरियन्ने ब्रिटोलाई ४–० ले पराजित गरेकी थिइन् भने क्वार्टरफाइनलमा सोफिया बेरुल्टसेभालाई पाखा लगाएकी थिइन् । एरिका १९औं एसियन गेम्समा उनैसँग पराजित भएकी थिइन् ।

एरिकाले सेमिफाइनलमा थाइल्याण्डकी केवलिन सोङगलिनलाई ८–० ले पाखा लगाउँदै फाइनल यात्रा गरेकी थिइन् ।