काठमाडौ। नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ ले रुकुम पूर्वको चुनवाङ पुग्दा भावुक बनेका छन् । जनयुद्धकालमा आफू, जीवनसंगिनी सीता दाहाल र छोरा प्रकाश दाहालसँगै बसेको पुरानो आश्रयस्थल अवलोकन गर्दा उनी आँसुमा भिजेका थिए ।
शनिबार चुनवाङको भेडीडाँडा पुगेका प्रचण्डले पहिले आफू र सीताले प्रयोग गरेको कोठा हेरे । त्यसपछि छोरा प्रकाश तथा अन्य सहयोद्धाहरू बसेको घर पनि पुगे । सीता र प्रकाश दुवैको निधन भइसकेकोले यो भ्रमण निकै भावनात्मक बनेको थियो । प्रचण्ड केहीबेर गीत गुनगुनाउँदै विह्वल भए, जसले कार्यकर्ता र स्थानीयलाई समेत स्तब्ध बनायो ।
‘नेपाली क्रान्तिमा उहाँहरू (सीता र प्रकाश) को योगदान र यो भूमि (चुनवाङ) को महत्त्व मेरो जीवनमा सधैं अमेट छ,’ उनले भावुक हुँदै भने । चुनवाङलाई ‘क्रान्तिको जननी र शान्तिको आधारभूमि’ का रूपमा चित्रण गर्दै उनले यो जिल्लाले नेपालको आमूल परिवर्तनमा गौरवशाली इतिहास रचेको उल्लेख गरे ।
२०६२ असोजमा तत्कालीन माओवादीको चुनवाङ बैठकले जनयुद्धलाई शान्तिपूर्ण राजनीतितर्फ मोड्ने निर्णय गरेको थियो । त्यसले सात दलसँग मोर्चा कायम गरी राजतन्त्रको अन्त्य र संघीय लोकतान्त्रिक गणतन्त्रको ढोका खोलेको दाबी गरिन्छ । प्रचण्डले यो ठाउँलाई समाजवाद निर्माणको सन्देश दिने उपयुक्त थलोका रूपमा लिएर फागुन २१ गते हुने प्रतिनिधिसभा निर्वाचनमा रुकुम पूर्वबाट उम्मेदवारी दिएका छन् ।
तीन दिनदेखि रुकुम पूर्वमा रहेका प्रचण्डले मतदाता भेटघाटका क्रममा चुनवाङ पुगेका हुन् । शनिबारै उनले गैरीगाउँ र पुथा उत्तरगंगा गाउँपालिकाको तकसेरा पुग्ने कार्यक्रम छ । यो भ्रमण जनयुद्ध दिवसको पूर्वसन्ध्यामा भएको हो, जसले प्रचण्डको चुनावी अभियानलाई भावनात्मक आधार प्रदान गरेको छ ।
रुकुम पूर्व जनयुद्धको प्रमुख आधार क्षेत्र हो, जहाँबाट प्रचण्डले यसपटक निर्वाचन लड्दै छन् । उनले चुनवाङ बैठकलाई गणतन्त्रको प्रस्थानविन्दु बताउँदै नयाँ ऊर्जासहित अघि बढ्ने प्रतिबद्धता व्यक्त गरेका छन् ।