न्यु जर्सी । विश्वकप फुटबलमा फ्रान्सको टोली केवल गोल गर्ने कलामा मात्र होइन, आफ्नो अटुट एकता र उत्कृष्ट खेल भावनाका कारण पनि प्रतिद्वन्द्वीहरूका लागि डरलाग्दो सावित हुँदै गएको छ । मंगलबार राति स्विडेनलाई ३–० ले पाखा लगाउँदै ‘ले ब्लुज’ ले फेरि एकपटक आफ्नो उत्कृष्टताको छनक दिन सफल भयो ।

खेलको सुरुवाती गोल गरेपछि केलियन एमबाप्पे सिँधै आफ्ना मुख्य प्रशिक्षक डिडियर देसच्याम्प्सलाई अँगालो हाल्न पुगेका थिए । आफ्नी आमाको अन्त्येष्टिमा सहभागी भएर टोलीमा फर्किएका देसच्याम्प्सका लागि यो एक भावनात्मक क्षण थियो । एमबाप्पे र देसच्याम्प्सलाई टोलीका

अन्य सदस्यहरूले पनि साथ दिए, जसले फ्रान्सेली टोलीभित्रको गहिरो मेलमिलाप झल्काउँथ्यो ।
प्रशिक्षक देसच्याम्प्सले खेलपछि भने,‘यो समूह एकताबद्ध छ । म नहुँदा पनि उनीहरूले उत्कृष्ट प्रदर्शन गरे । सामूहिक शक्ति नै सबैभन्दा ठूलो कुरा हो ।’

एमबाप्पेको कीर्तिमान र ओलिसेको जादु

खेलमा ब्राड्ली बारकोलाले दोस्रो गोल गरे भने एमबाप्पेले व्यक्तिगत दुई गोल गर्दै यस विश्वकपमा आफ्नो गोल संख्या ६ पुर्‍याएका छन् । उनी अहिले गोल्डेन बुटको दौडमा लियोनेल मेस्सीसँग बराबरीमा छन् । एमबाप्पेको विश्वकप इतिहासमा कुल १८ गोल पुगेको छ, जुन मेस्सीको कीर्तिमान (१९ गोल) भन्दा मात्र एक गोल कम हो ।

यस्तै, माइकल ओलिसेले यो खेलमा थप दुई असिस्ट (गोलका लागि पास) गर्दै प्रतियोगितामा आफ्नो असिस्ट संख्या ५ पुर्‍याए । सन् १९९४ यता एउटै विश्वकपमा ५ वा सोभन्दा बढी असिस्ट गर्ने उनी पहिलो खेलाडी बनेका छन् ।

विज्ञहरूको नजरमा फ्रान्स

इङ्गल्याण्डका पूर्व स्ट्राइकर इयान राइटले आईटीभी स्पोर्ट्ससँग कुरा गर्दै भने, ‘मैले देखेका विश्वकप टोलीहरूमध्ये फ्रान्स सबैभन्दा बलियो दावेदार हो ।’

त्यस्तै, ग्यारी नेभिलले फ्रान्सको अग्रपंक्ति (एमबाप्पे, डेम्बेले, ओलिसे र बारकोला) ले कुनै पनि डिफेन्डरका लागि दुःस्वप्न सिर्जना गर्न सक्ने बताए ।

स्विडेनका प्रशिक्षक ग्राहम पोटरले पनि हार स्वीकार्दै फ्रान्सलाई अहिलेसम्मकै उत्कृष्ट टोलीको संज्ञा दिएका छन् ।
उनले भने,‘यस्तो फ्रान्सेली टोलीसँग हार्नु कुनै अपमान होइन, मैले योभन्दा राम्रो टोली देखेको छैन ।’

आगामी यात्रा
चार वर्षअघि कतार विश्वकपको फाइनलमा अर्जेन्टिनासँग पेनाल्टी सुटआउटमा व्यहोरेको हारको बदला लिन फ्रान्स यसपटक दृढ देखिएको छ। फ्रान्सले यस प्रतियोगिताका चार खेलमा १३ गोल गरिसकेको छ ।

अब फ्रान्सले आगामी शनिबार फिलाडेल्फियामा हुने अन्तिम १६ (प्रि–क्वार्टरफाइनल) को खेलमा पाराग्वेको सामना गर्नेछ । प्रशिक्षक देसच्याम्प्सले भने टोलीलाई संयमित रहन आग्रह गरेका छन् ।

हामी अन्तिम १६ मा पुगेका छौं, यो केवल सुरुवात हो। हामीले अझै सुधार गर्नुपर्ने ठाउँहरू छन्,’ उनले भने । यदि फ्रान्सले पाराग्वेलाई पराजित गरेमा क्वाटरफाइनलमा क्यानडा वा मोरक्कोमध्ये एकसँग भिड्नेछ ।