काठमाडौं । लगातारको वर्षाका कारण काठमाडौँ उपत्यकासहित देशका १९ जिल्लाका साना नदी तथा खोलामा आकस्मिक बाढीको जोखिम बढेको छ। बाढी पूर्वानुमान महाशाखाले ठूला नदीमा तत्काल ठूलो जोखिम नरहे पनि साना नदीको बहाव अचानक बढ्न सक्ने भन्दै तटीय क्षेत्रमा बस्ने नागरिकलाई उच्च सतर्कता अपनाउन आग्रह गरेको छ।

महाशाखाका अनुसार बिहीबार रामेछाप, दोलखा, सिन्धुपाल्चोक, काठमाडौँ, भक्तपुर, ललितपुर र काभ्रेपलाञ्चोक हुँदै बग्ने साना नदीमा बहाव उल्लेख्य बढ्ने सम्भावना छ। उपत्यकाका नदी तथा खोलामा जलसतह अचानक बढ्न सक्ने भएकाले नदी किनार, खोला आसपास र जोखिमयुक्त क्षेत्रमा विशेष सावधानी आवश्यक देखिएको छ।

त्यसैगरी गोरखा, लमजुङ, कास्की, स्याङ्जा, पर्वत, रोल्पा, सल्यान, रुकुम पश्चिम, जाजरकोट, दैलेख, सुर्खेतलगायत क्षेत्रमा पनि साना नदीमा आकस्मिक बाढीको मध्यम जोखिम रहेको महाशाखाले जनाएको छ।

यद्यपि कोशी, नारायणी, बागमती, कर्णाली र महाकालीसहितका ठूला नदीमा बिहीबार बिहानसम्म जलसतह सतर्कता तहभन्दा तल रहेको छ। कन्काई, कमला, बबई, पूर्वी राप्ती तथा पश्चिम राप्ती नदीमा पनि बहाव सामान्य अवस्थामा रहेको महाशाखाको भनाइ छ।

तर जोखिम तत्कालका लागि मात्र सीमित नरहेको मौसम पूर्वानुमानले देखाएको छ। शुक्रबार बागमती, गण्डकी, लुम्बिनी र कर्णाली प्रदेशका केही साना नदीमा बहाव एक्कासि बढ्न सक्ने अनुमान गरिएको छ। शनिबार पनि गण्डकी, लुम्बिनी र सुदूरपश्चिम प्रदेशका केही साना नदीमा जलसतह अचानक बढ्ने सम्भावना छ।

विशेषगरी पहाडी क्षेत्रमा छोटो समयमा ठूलो वर्षा हुँदा साना नदी तथा खोलामा जलसतह तीव्र गतिमा बढ्ने भएकाले पूर्वसूचना नपुग्ने स्थानमा जोखिम अझ बढी हुन सक्छ। त्यसैले नदी किनारमा बसोबास गर्ने, खोला तर्ने तथा बाढी प्रभावित हुनसक्ने क्षेत्रमा रहेका नागरिकलाई मौसम र बाढीसम्बन्धी सूचना निरन्तर हेर्न आग्रह गरिएको छ।

ठूला नदी सामान्य अवस्थामा रहे पनि साना नदी र खोलामा अचानक आउने बाढीको जोखिम अहिले मुख्य चुनौती बनेको छ। उपत्यकासहित १९ जिल्लामा बिहीबारदेखि शनिबारसम्म जोखिम कायम रहने पूर्वानुमान रहेकाले नदी तथा खोला आसपासका बस्तीमा बस्ने नागरिकलाई समयमै सतर्कता अपनाउन र जोखिम बढे सुरक्षित स्थानतर्फ जान महाशाखाले आग्रह गरेको छ।