गण्डकी। पर्यटन सम्बद्ध सङ्घसंस्थाका अगुवाहरूले प्राकृतिक विपद्लगायत कारणले समस्यामा परेको मुलुकको पर्यटन क्षेत्रलाई पुनरुत्थान गर्न सरकार र निजी क्षेत्रबीच सहकार्यको खाँचो औँल्याएका छन् । पर्यटन क्षेत्रलाई उकास्न सबै पक्षको साझा पहल र ऐक्यबद्धता आवश्यक पर्नेमा सरोकार भएकाहरूले जोड दिएका हुन् ।

पोखरामा आयोजित ट्रेकिङ एजेन्सिज एसोसिएसन अफ नेपाल (टान) गण्डकीको ३३औँ वार्षिक साधारणसभामा सरकारी निकाय र निजी क्षेत्रका प्रतिनिधिहरूले पर्यटन क्षेत्रको समग्र विकासका लागि नीतिगत र संरचनागत सुधार गर्नुपर्ने बताएका हुन् ।

संस्कृति, पर्यटन तथा नागरिक उड्डयन मन्त्रालयका सचिव मुकुन्दप्रसाद निरौलाले बाढीपहिरो जस्ता विपद्बाट पर्यटकीय पूर्वाधारमा ठूलो क्षति पुगेको जनाउँदै तिनको पुनर्निर्माणलाई मन्त्रालयले प्राथमिकता दिने बताउनुभयो । “पर्यटन व्यवसायीलाई सरल र सहुलियपूर्ण कर्जा सुविधा, बजारीकरणलगायत क्षेत्रमा सहयोग पुर्‍याई व्यवसायलाई पुनःस्थापित गर्नुपर्ने आवश्यकता छ,” उहाँले भन्नुभयो, “पर्यटन क्षेत्रलाई पुनरुत्थान गर्न र चलायमान बनाउन मन्त्रालय टानलगायत निजी क्षेत्रका सङ्घसंस्थासँग सहकार्य गर्न तयार छ ।”

सचिव निरौलाले पर्यटनसँग सम्बन्धित विभिन्न कानुन परिमार्जन र संशोधनको तयारी अगाडि बढेकाले कानुन तर्जुमा मार्फत पर्यटन क्षेत्रको विकास र प्रवर्द्धनलाई थप गति दिइने बताउनुभयो । कानुनी अन्यौलताका कारण पनि तीन तहका सरकारबीच प्रभावकारी समन्वय र सहकार्य हुन नसकेको उल्लेख गर्दै उहाँले नीति तथा कानुन निर्माणलाई मन्त्रालयले प्राथमिकता दिएको बताउनुभयो । उहाँले नेपाल पर्यटन बोर्डलाई समयसापेक्ष रूपमा पुनःसंरचनासहित रुपान्तरण गर्दै लैजानुपर्नेमा जोड दिनुभयो ।

टानका अध्यक्ष सागर पाण्डेले पर्यटन क्षेत्रको विकास र प्रवर्द्धनका लागि सात वटै प्रदेशमा पर्यटन हर्ने छुट्टै विभाग गठन स्थापना गर्नुपर्ने बताउनुभयो । नेपाल पर्यटन बोर्डले मात्र सिङ्गो देशको पर्यटन क्षेत्रलाई नेतृत्व गर्न नसक्ने उहाँको भनाइ छ ।

नेपालमा अन्तरराष्ट्रिय पर्यटन प्रवर्द्धनको उद्देश्यले गठित पर्यटन बोर्डलाई पूर्वाधार निर्माण जस्ता अतिरिक्त कामको जिम्मेवारी दिइनु उचित नरहेको अध्यक्ष पाण्डेले बताउनुभयो । उहाँले अहिलेको अवस्थामा नेपालमा पर्यटकको सङ्ख्या वृद्धिमा ध्यान दिनुपर्ने बताउनुभयो ।

“गुणस्तरीय पर्यटनको बहस पनि सुरु भएको छ तर अहिलेलाई हामीले सबैखाले पर्यटक भित्र्याउन जोड दिनुपर्छ,” अध्यक्ष पाण्डेले भन्नुभयो, “पर्यटकको आगमन बढ्दै गयो भने गुणस्तरीय पर्यटनलाई योजनाबद्ध प्रवर्द्धन गर्न सकिन्छ ।” आन्तरिक पर्यटन प्रवर्द्धनमा पनि राज्यका निकाय र निजी क्षेत्रको ध्यान जानुपर्नेमा उहाँले जोड दिनुभयो ।

पर्यटन बोर्डका कार्यकारी सदस्य सन्तोष पोखरेलले पर्यटन क्षेत्रको विकास र प्रवर्द्धनका लागि बोर्डले निजी क्षेत्रसँग सहकार्य गर्दै आएको बताउनुभयो । अहिलेको सरकारले पर्यटन विकासका लागि नयाँ सोच र योजना ल्याएकाले त्यसलाई सबै मिलेर सफल पार्नुपर्ने उहाँको भनाइ छ ।

पोखरा पर्यटन परिषद्का अध्यक्ष हरि भुजेलले पोखरा अन्तरराष्ट्रिय विमानस्थलबाट भर्खर सुरु भएको अन्तरराष्ट्रिय उडानलाई दिगो र प्रभावकारी बनाउन सके मुलुककै पर्यटन क्षेत्रले लाभ लिने धारणा राख्नुभयो । पोखराको पर्यटनमा अर्बौंको लगानी भएको जनाउँदै उहाँले सरकारले व्यवसायीको हकहित र लगानी सुरक्षाका लागि आवश्यक नीतिगत प्रबन्ध गर्नुपर्ने बताउनुभयो ।

साधारणसभाका अवसरमा गण्डकी प्रदेशको पर्यटन प्रवर्द्धनमा भूमिका खेल्ने व्यवसायी, पत्रकारलगायतलाई सम्मान गरिएको पूर्वअध्यक्ष कृष्णप्रसाद आचार्यले बताउनुभयो । अधिवेशनबाट तीर्थराज सुवेदीको नेतृत्वमा सर्वसम्मत कार्यसमिति चयन भएको ‘टान’ गण्डकीले जनाएको छ ।

समितिको प्रथम उपाध्यक्षमा मोहनप्रसाद सुवेदी, द्वितीय उपाध्यक्षमा गोपालकृष्ण सङ्ग्रौला, सचिवमा भूपेन्द्रकुमार लामा, सहसचिवमा प्रकाश पौडेल र कोषाध्यक्षमा चन्द्रबहादुर भुजेल चयन हुनुभएको छ । सदस्यमा बलराम दाहाल, भूपेन्द्र गौतम, अजयराम अधिकारी, शिव क्षेत्री र श्रीराम पाखरेल चयन हुनुभएको छ । दुई सदस्य पछि मनोनीत गरिने जनाइएको छ ।