सिन्धुपाल्चोक ।

सिन्धुपाल्चोकको बलेफी गाउँपालिका–४ विन्जेलका कृषकले दूध बेचेर एकै आर्थिक वर्षमा २ करोडभन्दा बढी आम्दानी गरेका छन् ।

गाउँमै सञ्चालनमा गरेको विन्जेल दुग्ध उत्पादक सहकारी संस्थामार्फत दूध बेचेर ती कृषकले उक्त आम्दानी गरेका हुन् ।

कृषक डिल्लीराम नेपाल एक वर्षमा १३ हजार ९७९ लिटर दूध बेचेर ८ लाख २३ हजार ६ सय आम्दानी गरेको बताउछन् । ४ वटा गाई पालेका उनी दैनिक ३० देखि ३५ लिटरसम्म दूध बेच्ने गछन् । नेपाल संस्थाका सदस्यमध्ये सबैभन्दा बढी दूध बेच्ने कृषक हुन् ।

अर्का कृषक ताराप्रसाद नेपालले पनि ११ हजार ४ सय ५४ लिटर दूध बेचेर ६ लाख ८२ हजार एक सय ९९ आम्दानी गरेका छन् । त्यसैगरी तोयानाथ नेपालले ११ हजार लिटर दूध बेचेर ६ लाख ३३ हजार ३ सय र रवीन्द्र नेपालले ३ हजार तीन सय २४ लिटर दूध बेचेर ६ लाख २१ हजार २ सय कमाउन सफल भएका छन् ।

मिहेनत गर्ने हो भने घरमै बसेर मनग्य आम्दानी गर्न सकिने उदाहरण बित्तजेलका कृषकले देखाएका छन् । घरमै बसेर खेतीपती र वस्तुभाउ दुवै पेसालाईसँगै लगेर लखपति बन्न सकेकोमा कृषक तोयानाथ खुसी छन् ।

उनीजस्तै २८० कृषकले नियमितरुपमा दूध बेच्दै आइरहेका छन् । उक्त संस्थाले गत आवमा मात्रै चार लाख ७७ हजार सात सय ७९ लिटर दूध सङ्कलन तथा बिक्री गरेको व्यवस्थापक द्वारीका नेपालले जानकारी दिए ।

दूध बिक्रीबाट मात्रै संस्थाले एक वर्षमा २ करोड एक लाख दस हजार आम्दानी गरेको छ । उक्त संस्थाले एक वर्षमा ७ करोड ५१ लाख २८ हजार पाँच सय २२ को कारोबार गर्नाका साथै दूध बिक्री, ढुटो पिना खरिद तथा बिक्री र रासायनिक मल खरिद तथा बिक्रीको कारोबार पनि गर्दै आएको छ ।

संस्थाको शेयर सदस्य भने चार सय ३६ छन् । सबै सदस्य बचत कार्यक्रममा नियमित सहभागी रहँदै आएको संस्थाका सचिव मायानाथ नेपाल बताउछन् ।