इनरुवा ।

कोसी प्रदेश सरकारका मुख्यमन्त्री केदार कार्कीले इनरुवा–दुहबी सडकको निर्माण चाँडै सुरु हुने बताएका छन् ।

सुनसरी सदरमुकाम इनरुवा–१ मा आज स्थानीयसँगको कुराकानीका क्रममा मुख्यमन्त्री कार्कीले सो सडकखण्ड निर्माणका लागि बोलपत्र आह्वानको प्रक्रिया अगाडि बढेकाले निर्माण चाँडै सुरु हुने उल्लेख गरे । ‘सडकखण्ड निर्माण प्रदेश वा संघ सरकार कसले गर्ने विषयमा अन्योल थियो । अब त्यो समस्या समाधान भएकाले निर्माण चाँडै सुरु हुन्छ,’ उनले भने ।

फरक प्रसंगमा मुख्यमन्त्री कार्कीले कोसी प्रदेशका सबै १० वर्षमुनिका बालबालिकालाई प्रदेश सरकारले निःशुल्क स्वास्थ्य उपचारका लागि व्यवस्था गरेको उल्लेख गरे । मुख्यमन्त्री कार्कीले यस जिल्लाको विकासका लागि टुक्रे योजनाभन्दा जनतालाई प्रत्यक्ष फाइदा हुने योजना आवश्यक भएको बताए ।

त्यस अवसरमा नेपाली कांग्रेसका केन्द्रीय सदस्य राजीव कोइराला, पूर्वराज्यमन्त्री सीताराम मेहता, जिल्ला समन्वय समिति सुनसरीका सभापति राजन मेहता, इनरुवा नगरपालिकाका प्रमुख केदार भण्डारी, उपप्रमुख विनिताकुमारी मेहता, इनरुवा–५ का वडाध्यक्ष अनिल पोखरेल, कांग्रेस सुनसरीका पंकज महतो, वीरेन्द्रकुमार साहलगायतको सहभागिता थियो ।

सहभागीले इनरुवा–दुहबी सडक निर्माण सुरु गर्न आग्रह गरेका थिए ।