जिल्लामा आर्थिक वर्ष २०७९/८० मा २ सय ९१ घरेलु उद्योग दर्ता भएका छन् ।

१ वर्षको अवधिमा पर्यटन तथा साना उद्योग कार्यालय लमजुङमा २ सय ९१ नयाँ उद्योग दर्ता भएका हुन् ।

यस अवधिमा ३ सय ९८ घरेलु उद्योगको नवीकरण भएको कार्यालय प्रमुख मीताकुमारी थापाले बताए । उनका अनुसार सोही अवधिमा वाणिज्यतर्फ २०८ नयाँ दर्ता भएका छन् भने ५ सय १८ को नवीकरण भएको छ ।

आव २०७८/७९ मा छ सय ८५ घरेलु उद्योग दर्ता भएका थिए । कार्यालय प्रमुख थापाका अनुसार सो अवधिमा दुई सय ८२ घरेलु उद्योगको नवीकरण भएका थिए । वाणिज्यतर्फ चार सय आठ नयाँ दर्ता भएका थिए भने तीन सय ७१ नवीकरण भएका उक्त कार्यालयले जनाएको छ ।

कार्यालयका अनुसार आव २०७७/७८ मा नौ सय ७०, आव २०७६/७७ मा छ सय ६९, आव २०७५/७६ मा चार सय ६८ आव र २०७४/७५ मा दुई सय ६७ नयाँ उद्योग दर्ता भएका कार्यालयले जनाएको छ ।

बेँसीसहर बजार, सुन्दरबजार, भोटेओडार, सोती पसल भोर्लेटारलगायत स्थानमा उद्योग/व्यवसाय तथा पसल गर्नेको सङ्ख्या बढिरहेकाले नयाँ उद्योग दर्ता पनि बढेको कार्यालय प्रमुख थापाले बताए।

उनका अनुसार दर्ता भएकामध्ये अधिकांश कृषि फर्म, सिलाइकटाइ, अलैँची, ब्युटिपार्लर, कृषि औजार, मौरीपालन, बङ्गुर फर्म, दालमोठ उद्योग, पर्यटन उद्योगलगायत छन् । जिल्लामा हालसम्म ५ हजार ६६२ घरेलु उद्योग दर्ता भएको छ भने ५ हजार ३४५ वाणिज्य दर्ता भएको उक्त कार्यालयले जनाएको छ ।