काठमाडौं – ललितपुरको ग्वार्कोमा निर्माणाधीन फ्लाइओभर निर्माण दशैँ अघिको अविरल झरीका कारण प्रभावित भएको छ । दशैँसम्म निर्माण सम्पन्न गरी सवारीसाधन चलाउने भनिए पनि सरकारी अधिकारीहरूले सो लक्ष्य पूरा गर्ने भाका तीन महिना पछिका लागि सारेका छन् ।

असोज १० देखि १३ गतेसम्म परेको अविरल वर्षाका कारण फ्लाइओभरको मूख्य पुलतर्फ माथि जाने स्ल्याब ढलानलगायत काम अवरुद्ध रोकिएको थियो । निरन्तरको वर्षाका कारण निर्माणकार्य नै अवरुद्ध भएको थियो ।

त्यसअघि बर्खाका बेला पनि फ्लाइओभर निर्माणको काम प्रभावकारी भएको थिएन । असोज लागेसँगै आयोजना निर्माणले गति लिने अपेक्षा गरिएको थियो । तर, असोज दोस्रो साता तीन दिनसम्म देशभर लगातार वर्षा भएसँगै बाँकी निर्माण कार्य समेत ठप्प भएको थियो ।

वर्षाका कारण ग्वार्को फ्लाइओभर निर्माणका बाँकी काम अघि बढ्न नसकेको सडक विभागअन्तर्गत गुणस्तर, अनुसन्धान तथा विकास केन्द्रका निर्देशक प्रभातकुमार झाले खबरहबलाई जानकारी दिए ।

उनका अनुसार फ्लाइओभरमा मुख्य पुलतर्फ माथि जाने स्ल्याबको ढलान भइसकेको छ । त्यसको दायाँ–बायाँ ‘ब्यारियर’ वाल राख्ने काम वर्षाका कारण रोकिएको छ । पानी परेपछि त्यहाँसम्म जाने पहुँच सडकसम्म र्‍याम्प निर्माणले गति लिन नसकेको आयोजनाले जनाएको छ ।

‘ग्वार्को फ्लाइओभरको निर्माण अन्तिम चरणमा छ । वर्षा नभएको भए दशैंसम्म सम्पूर्ण निर्माण सक्ने योजना थियो,’ उनले भने, ‘तर, असोज लागेसँगै देशभर पानी परेकाले बाँकी काम अघि बढ्न सकेको छैन् ।’ हालसम्म आयोजनाको ८० प्रतिशतभन्दा बढी निर्माणकार्य सम्पन्न भएको झाले जानकारी दिए ।

आयोजनामा पहुँच सडक, ट्राफिक लाइट जडान लगायतका केही काम बाँकी छन् । आयोजना निर्माणको ठेक्का अवधि २०८१ पुस मसान्तसम्म थप गरिएको छ । आयोजना निर्माणका बाँकी काम थपिएको म्याद अवधिभित्रै सम्पन्न गर्ने लक्ष्य रहेको झाले बताए ।