पोखरा । २६ दिनदेखि कास्की प्रहरी हिरासतमा रहेका रास्वपाका सभापति तथा पूर्वगृहमन्त्री रवि लामिछानेलाई बुद्ध एयरको जहाजमा एक घन्टा राखेर पुनः प्रतीक्षा कक्षमा झारिएको छ । पोखराबाट बयानका लागि भैरहवामा ल्याउन बिहानै साढे ५ बजे नै उनलाई जहाजस्थल पुर्‍याइएको थियो । बिहान पौने ८ को उडान भएपनि भैरहवामा भिजिविलिटी नभएकोले बाहिरै राखिएको थियो ।

भैरहवामा मौसम सुधार भएको भन्दै १०स्२९ बजे जहाजमा राखिएपनि साढे ११ बजेसम्म भैरहवामा कमजोर भिजिविलिटीका कारण जहाज उड्न सकेको छैन । अहिले जहाजबाट रविसहित सबैलाई झारेर प्रतीक्षा कक्षमा लगिएको जनाइएको छ । उनलाई पोखरा विमानस्थलको विशिष्ट कक्षमा राखिएको छ भने अन्य यात्रुहरूलाई प्रतीक्षा कक्षमा राखिएको छ । पोखरा जहाजस्थलमा पनि उनलाई विशेष सुरक्षाभित्र राखिएको र आफूहरू अन्य ठाउँमा रहेको एक यात्रुले बिकासटाइम्सलाई बताए ।

यता रुपन्देहीमा लामिछानेलाई ल्याउने भएपछि बिहानैबाट गौतमबुद्ध जहाजस्थलमा सुरक्षा व्यवस्था कडा बनाइएको छ । उनलाई ल्याउने तयारीपछि रास्वपा लुम्बिनी प्रदेशले भैरहवाको बुद्धचोक, लुम्बिनी गेटमा प्रदर्शन थालिसकेका छन् भने एयरपोर्टमै पुगेर पनि समर्थकहरूले प्रदर्शन गरिरहेको रास्वपा प्रदेश अध्यक्ष देवराज पाठकले बताए । उता सुप्रिम ऋण तथा बचत सहकारी पीडितहरुले पनि भैरहवामै प्रदर्शनको तयारीका लागि पुगेका छन् । उनीहरूले ११ बजेदेखि प्रदर्शन गर्ने सहकारी पीडित संघर्ष समितिका संयोजक विजय नेपालले जनाए । उनले कसैको समर्थन र विरोधभन्दा पनि आफूहरुले न्यायका लागि विरोध गरेको बताए ।
रुपन्देही प्रहरी प्रमुख रञ्जितसिंह राठौरले जहाजस्थलबाट सिधै सरकारी वकिल कार्यालयमा लगेर बयान सुरु गर्ने बताएका छन् । प्रशासनले भने दुवै तर्फको प्रदर्शनलाई रोक्न निषेधित क्षेत्र घोषणा गर्ने तयारी गरेको छ । लुम्बिनी गेट, बुद्धचोक, सरकारी वकिल कार्यालय परिसर र जिल्ला अदालत क्षेत्रमा निषेधाज्ञा लगाउने तयारी भएको सुरक्षास्रोतले जनाएको छ ।