काठमाडौँ। मित्रराष्ट्र भुटानमा आयोजना भएको यूथ एक्सचेन्ज प्रोग्राममा सहभागी हुन गएको राष्ट्रिय सेवा दलको टोली बिहीवार(आज) स्वदेश फर्किएको छ।

सहायक रथी महेश कुमार थापाको नेतृत्वमा ९ सदस्यीय टोली मिति २०८१ मंसिर २९ गते भुटान प्रस्थान गरेको थियो। टोलीमा राष्ट्रिय सेवा दलका क्याडेट छात्र/छात्राहरू सहभागी थिए।

वि।सं। २०२२ सालमा स्थापना भएको राष्ट्रिय सेवा दलले नेपालका छात्र/छात्राहरूलाई समावेश गरी नेतृत्व दक्षता, अनुशासन र राष्ट्रिय सेवाको भावना विकास गर्ने तालिम सञ्चालन गर्दै आएको छ। विक्रम संवत् २०२६ सालदेखि राष्ट्रिय सेवा दलका क्याडेटहरुले भारत, श्रीलङ्का, बङ्गलादेश, भुटान, मालदिभ्स, पाकिस्तान, सिंगापुर लगायतका विभिन्न देशहरूमा आयोजना हुने यूथ एक्सचेन्ज प्रोग्राम मा सहभागी हुँदै आएका छन्।

राष्ट्रिय सेवा दल अन्तर्गत नेपालमा हालसम्म ७४,४८० जना छात्ररछात्राहरुले सिनियर तथा जुनियर डिभिजन तालिम प्राप्त गरिसकेका छन् भने यस वर्ष ७,७०४ छात्र/छात्राहरु तालिममा सहभागी भइरहेको नेपाली सेनाले जनाएको छ ।

यस प्रकारका अन्तर्राष्ट्रिय आदानप्रदान कार्यक्रमले विद्यार्थीहरूको क्षमता, अनुभव र अन्तर्राष्ट्रिय सम्बन्ध सुधारमा ठूलो योगदान पुर्‍याउने विश्वास राष्ट्रिय सेवा दलले व्यक्त गरेको छ।