काठमाडौँ । सरकारले खुटिया, दिपायल, चैनपुर, उरैभन्ज्याङ सडक योजनाका लागि एक अर्बको स्रोत सुनिश्चितता गरेको छ ।

धनगढी हसनपुरबाट सुरु भएर स्याउले खुटिया हुँदै दिपायल चैनपुर र चिनियाँ सिमाना उरैभन्ज्याङसम्म जोड्ने सडकको चर्चा धेरै भएपनि बजेट अभावमा कामले तीव्रता पाउन सकेको थिए । तर, अर्थ मन्त्रालयको बजेट तथा कार्यक्रम महाशाखाले उक्त योजनालाई स्रोत सहमति प्रदान गरेको विवरणमा समावेश गरेर १ अर्ब रकमको स्रोत सुनिश्चितता गरेपछि रोकिएको काम अघि बढ्ने अपेक्षा गरिएको छ ।

सुदूरपश्चिमको मात्र नभई मुलुकको आर्थिक संवृद्धिमा टेवा पुग्न सक्ने नेपाल भारत र चीन जोड्ने मार्ग निर्माणमा सरकारले तदारुकता देखाएको भन्दै नेकपा एमाले जिल्ला कमिटी बझाङले प्रधानमन्त्री केपी शर्मा ओलीलाई आभार प्रकट गरेको छ ।

पुस १३ गते बालुवाटार पुगेर एमाले बझाङको सिंगो टोलीले प्रधानमन्त्री ओलीसँग ११ बुँदे माग राखेको थियो । त्यसको दोस्रो नम्बरमा खुटिया दिपायल चैनपुर ताक्लाकोट सडकलाई बजेट विनियोजन गर्न माग थियो ।

प्रधानमन्त्रीलाई माग राखेको एक महिनामै उक्त सडकको लागि बजेट विनियोजन गरेर काम अघि बढाउने वातावरण सृजना गरिएको एमाले केन्द्रीय सदस्य तथा बझाङ जिल्ला प्रतिनिधि सभा इन्चार्ज ऐन महरले बताएका छन् ।

चीन र भारतलाई जोड्ने यो सबैभन्दा छोटो सडक हो ।यो सडकखण्ड निर्माण गर्न सके सुदूरपश्चिम प्रदेश त्रिदेशीय व्यापारिक क्षेत्रका रूपमा स्थापित हुने र संवृद्धिको ढोका खुल्ने नेता महरले बताए ।