रसुवा। रसुवागढी नाकाबाट स्याउ बोकेर काठमाडौं आउँदै गरेको ट्रकमा प्रहरीले ठूलो परिमाणमा सुन बरामद गरेको छ। गोसाइँकुण्ड गाउँपालिकामा प्रहरीले सुराकीको आधारमा ट्रक रोकेर चेकजाँच गर्दा करिब ७ किलोग्राम सुन फेला परेको हो।

प्रहरीका अनुसार बरामद सुन सातवटा बिस्कुटको रूपमा थियो। सुनको तौल मापन गर्ने कार्य जारी रहेको र अनुमानित तौल ७ केजी रहेको प्रहरीले जनाएको छ।

घटनाबारे थप अनुसन्धानका लागि ट्रकका चालकलाई पक्राउ गरिएको छ। प्रहरीले सुराकीको आधारमा ट्रक नियन्त्रणमा लिएर चेकजाँच गरेको थियो। यो घटनाले सीमा क्षेत्रमा तस्करीको गतिविधिमाथि थप प्रश्न उठाएको छ।

अनुसन्धान जारी रहेको र थप विवरण आउन बाँकी रहेको प्रहरीले बताएको छ।