काठमाडौ । ग्वार्को चोकमा निर्माणाधीन चार लेनको ओभरपासको काम जेठभित्र सम्पन्न हुने भएको छ। सडक विभागका अनुसार, निर्माणको अन्तिम चरणमा रहेको यो परियोजना असार पहिलो साताबाट सवारी सञ्चालनका लागि तयार हुनेछ।

सन् २०७८ फागुनमा दुई वर्षभित्र सक्ने लक्ष्यसहित सुरु भएको यो परियोजना विभिन्न प्राविधिक समस्याका कारण १५ महिना ढिलो भएको हो। ३२० मिटर कोटेश्वरतर्फ र १८५ मिटर सातदोबाटोतर्फको यो ओभरपास १०.२ मिटर अग्लो छ। हाल कोटेश्वरतर्फ पहिलो तहको कालोपत्रे सुरु भएको छ भने सातदोबाटोतर्फ बेस राख्ने काम भइरहेको छ।

सडक विभागका उपमहानिर्देशक अर्जुनप्रसाद अर्यालका अनुसार, कालोपत्रेपछि रेलिङ लगाउने र सडक सुरक्षासम्बन्धी काम सम्पन्न गरी निर्माण कम्पनीले विभागलाई हस्तान्तरण गर्नेछ। “यो ओभरपासले कोटेश्वर–कलंकी खण्डको ट्राफिक जाम कम गर्नेछ,” उनले भने। लुभुतर्फ जाने सवारीले ओभरपासमुनिबाट र कोटेश्वर–कलंकी जाने सवारीले माथिबाट आवतजावत गर्नेछन्।

आशिष–समानान्तर–रेलिगेर जेभीले १७ करोड ६ लाख ८८ हजार रुपैयाँमा ठेक्का लिएको यो परियोजना हाल ८५% सम्पन्न भएको छ। डिजाइन समस्याका कारण १३ महिना काम रोकिएको थियो। निर्धारित म्याद (२०८१ पुस ९) मा काम नसकिएपछि ठेकेदार कम्पनीलाई प्रतिदिन ०.०५% जरिवाना लगाइएको छ। निर्माण सम्पन्न भएको पाँच वर्षसम्म मर्मतसम्भारको जिम्मा पनि ठेकेदारकै हुनेछ।

कोटेश्वर–ग्वार्को–सातदोबाटो–कलंकी खण्डमा निर्माण अवधिभर ट्राफिक जामको समस्या रहँदै आएको छ। यो ओभरपास सञ्चालनमा आएपछि यो क्षेत्रमा ट्राफिक सहज हुने अपेक्षा गरिएको छ।