दार्चुला ।

दार्चुलामा एक वृद्धाको हत्या भएको छ।

मालिकार्जुन गाउँपालिका–७ टोपालीकी ८५ वर्षीया एकल महिला भागरथी चन्दलाई चक्कुले हानेर हत्या गरिएको हो।

जिल्ला प्रहरी कार्यालयका प्रहरी निरीक्षक ज्ञानेन्द्रबहादुर सिंहका अनुसार वृद्धाको शव सोमबार घरभन्दा २०० मिटर पर खोल्सामा फेला परेको छ।

चन्दको घाँटी र छातीमा चक्कु प्रहार भएको छ। वृद्धा टोपालीस्थित घरमा एक्लै बस्थिन्। शनिबारदेखि उनी सम्पर्कविहीन भएपछि आफन्तले आइतबार प्रहरी चौकीमा निवेदन दिएका थिए।

उनको शव अहिले पोस्टमार्टमका लागि जिल्ला अस्पताल ल्याइएको प्रहरीले जनाएको छ।

हत्याको कारण र संलग्नको पहिचान खुलेको छैन। घटनाको अनुसन्धान सुरु गरिएको प्रहरीले जनाएको छ।