काठमाडौँ। परराष्ट्र मन्त्री डा. आरजू राणा देउवाले नेपालका लागि इजरायली राजदूत श्मुलिक आरिए बास्‌सँग भेटवार्ता गरेकी छन् ।

परराष्ट्र मन्त्रालयमा भएको शिष्टाचार भेटमा द्विपक्षीय सम्बन्ध थप सुदृढ गर्ने विषयमा कुराकानी भएको मन्त्री डा. राणाले जानकारी दिइन् ।

भेटबारे मंगलबार बेलुकी सामाजिक सञ्जालमा पोस्ट गर्दै मन्त्री डा. राणाले लेखेकी छन्, ‘इजरायलका राजदूत महामहिम श्मुलिक एरिए बाससँग शिष्टाचार भेट भयो, नेपाल–इजरायल सम्बन्ध सुदृढ बनाउने, कृषि, शिक्षा, प्रविधि र विकासमा सहकार्य बढाउने तथा साझा विश्वव्यापी चासोका विषयमा छलफल गरियो ।’

भेटमा द्विपक्षीय सम्बन्ध विस्तारसँगै आपसी हित तथा कृषि प्रविधि र शैक्षिक सहकार्यमा थप समझदारी र कार्यक्रम सञ्चालन गर्ने विषयमा कुराकानी भएको उनले उल्लेख गरेकी छन् ।

नेपाल र इजरायलबीच कूटनीतिक सम्बन्ध स्थापना भएको ६० वर्षभन्दा बढी भएको छ । पछिल्ला वर्षहरूमा इजरायली प्रविधिबाट नेपाली कृषकलाई तालिम दिने, श्रमिक पठाउने लगायतका कार्यक्रममा दुई देशबीच सहकार्य हुँदै आएको छ । हाल इजरायलमा ५५०० भन्दा बढी नेपालीहरू रहेको सरकारी तथ्याकं छ ।

युद्धग्रस्त क्षेत्र इजरायलमा नेपालीको सुरक्षाबारे चिन्ता व्यक्त हुँदै आएको छ । पछिल्लो भेटमा सो बारे कुरा भए नभएकोबारे भने मन्त्री डा. राणाले केही उल्लेख गरेकी छैनन् ।